«Бернли» – «Мидлсбро». Сәтпаев ойнай ма? Тікелей эфир. LIVE-көрсетілім
2 қыркүйектен 3 қыркүйекке қараған түні «Бернли» Чемпионшиптегі кезекті матчын өткізеді. Дастан Сәтпаевтың командасы өз алаңында «Мидлсброны» қабылдайды, деп хабарлайды Sports24.kz.
Алдағы кездесу «Бернли» үшін ерекше маңызға ие. Команда жаңа маусымды сәтсіз бастады және үш турдан кейін әлі бірде-бір жеңіске жете алған жоқ.
Чемпионаттың алғашқы кездесуінде «Бернли» «Вест Хэм Юнайтедпен» 2:2 есебімен тең түсті. Одан кейін команда қатарынан екі рет жеңіліп, «Вест Бромвич Альбионға» 1:3, ал «Норвич Ситиге» 1:4 есебімен есе жіберді.
Ағылшын лигасының кубогындағы жорығы да сәтсіз аяқталды. «Бернли» «Брэдфорд Ситиге» пенальти сериясында 2:4 есебімен жол беріп, жарыстан шығып қалды.
Осы тұрғыдан алғанда, «Мидлсбромен» кездесу «Бернли» үшін сәтсіз серияны тоқтатып, маусымдағы алғашқы үш ұпайын алуға жақсы мүмкіндік болмақ.
Қазақстандық жанкүйерлердің назары Дастан Сәтпаевқа да ауады. 18 жастағы футболшы Чемпионшипте екі матч өткізіп үлгерді және біртіндеп «Бернли» құрамынан өз орнын табуда. «Норвичке» қарсы өткен соңғы ойында Сәтпаев алаңда толық 90 минут ойнап, өнеріне жоғары баға алды.
«Мидлсбромен» кездесу алдында ағылшындық БАҚ Сәтпаевты «Бернлидің» болжамды негізгі құрамына қосты. Сондықтан қазақстандық шабуылшының бұл жолы да алғашқы минуттардан бастап алаңға шығуы мүмкін.
Кездесу «Терф Мур» стадионында өтіп, Қазақстан уақытымен 00:00-де басталады. «Бернли» – «Мидлсбро» матчының тікелей трансляциясы осы сілтеме арқылы қолжетімді.
