«Қазақ терминаторы» IBA Nomad 16 турнирінде қарсыласын нокаутқа түсірді
IBA Nomad 16 турнирінің басты кардында қазақстандық Мұратбек Қасымбай дағыстандық Залимхан Юсуповпен ММА қолғаптарындағы бокс ережесі бойынша кездесті, деп хабарлайды Sports24.kz.
Жекпе-жек алдында қазақстандық спортшы ресейлік қарсыласын бауырға соққы жасау арқылы нокаутқа түсіруге уәде берген еді.
Екінші раундта Мұратбек қарсыласын екі рет нокдаунға жіберді. Алдымен бауырға жасаған соққысымен Юсуповты тізерлетті, кейін дәл бүйірден соққы жасады.
Үшінші раундта Мұратбек аперкотпен қарсыласын ринг төсенішіне құлатты. Осыдан кейін төреші үшінші нокдаунды санады, бірақ жекпе-жекті тоқтатпады. Бауырға жасалған дәл соққыдан кейін Юсупов орнынан тұра алмады, ал төреші қазақстандық спортшының техникалық нокаутпен жеңіске жеткенін тіркеді.
Қасымбайдың жекпе-жекке шықпағанына бір жылдан астам уақыт болды. Қазақстандық спортшы соңғы рет All Stars турнирінде бокс ережесі бойынша өнер көрсетіп, Мұхаммад Хейбатимен реваншта жекпе-жекті тең нәтижемен аяқтаған еді.
Қасымбайдың өзі айтқандай, үзіліс денсаулығына байланысты болған.
IBA Nomad 16 турнирінің басты кардында Бекжан «Аю» Бәкіров пен Торғынбек Әмиров те өнер көрсетеді. Ал Жалғас Жұмағұлов Асрор Ақпарходжаевтан жеңілді.
