«Әрі қарай өтеді»: Исламхан жауапты матч алдында «Қайратқа» қолдау көрсетті
«Қайраттың» бұрынғы капитаны және «Астана» жартылай қорғаушысы Бауыржан Исламхан Sports24.kz тілшісіне берген сұхбатында алматылықтардың Болгарияның «Левски» клубына қарсы Чемпиондар лигасының іріктеу кезеңіндегі жауапты ойыны алдында күтетін әсерлерімен бөлісіп, командаға сәттілік тіледі.
Қос команданың алғашқы кездесуі Софияда өтіп, иелердің 1:0 есебімен жеңісімен аяқталды. «Левски» ойынның басым бөлігінде бастаманы өз қолына алды, ал «Қайрат» қарсыластың қақпасына бірде-бір дәл соққы бағыттай алмады. Алматылықтардың қақпашысы Темірлан Анарбеков сенімді ойын көрсеткенімен, қосымша уақытта Сержиньо болгар клубына жеңіс сыйлады.
«Қайратта» көп жыл өнер көрсеткен Бауыржан бұрынғы командасына жанкүйер болатынын жасырмады.
«Менің қанша жыл «Қайратта» ойнағанымды білесіздер. Алдағы ойында жүрегіммен жанкүйер боламын. Оларға сәттілік тілеймін және келесі кезеңге өтеді деп сенемін», – деді жартылай қорғаушы.
Исламхан Түркістандағы матч туралы
«Астана» жартылай қорғаушысы жауапты кездесудің Алматыда емес, Түркістанда өтетініне қатысты пікірін айтты.
«Мен үшін, әрине, Алматыда өткізгендері жақсы болар еді. Бірақ қандай жағдай болса да, қай стадионда өтсе де, ойын Қазақстанда өтеді. Жеңіске жету үшін бар күштерін салады деп сенемін. Оларға сәттілік тілеймін», – деді ойыншы.
Жауапты матч қашан өтеді?
Жауапты кездесу 11 тамыз күні Түркістандағы «Түркістан Аренада» өтеді. Ойынның басталуы Қазақстан уақытымен 20:00-ге жоспарланған.
«Қайрат» жеңсе, келесі қарсылас кім?
Егер «Қайрат» «Левскиден» өте алса, алматылықтар Чемпиондар лигасының плей-офф кезеңінде Грекиялық АЕК-пен кездеседі. Алғашқы матч 18 немесе 19 тамызда, қарымта ойын 25 немесе 26 тамызда өтеді.
