Сатпаевтың бапкері «Бристоль Ситиге» қарсы ойын алдында қатаң талаптарын ашып айтты
«Бернли» бас бапкері Ники Хайен Чемпионшиптің 5-туры аясында «Бристоль Ситиге» қарсы өтетін матч қарсаңында ашық мәлімдеме жасады, деп хабарлайды Sports24.kz.
«Бордолылардың» жаттықтырушысы алаңға көбірек футболшыға мүмкіндік беру үшін құрамда жиі ауыс-түйіс жасағанды жөн көретінін мойындады. Кейде бұл шешім ойыншыны қорғау қажеттілігінен туындайды.
«Мен батыл ауыс-түйіс жасаймын ба? Бұл шынымен де маңызды. Сондықтан біз әр ойыншының процеске тартылғанын қалаймыз. Футболшылар негізгі құрамға шықпағанда немесе матчты соңына дейін ойнамағанда әрдайым көңілі қалады. Біз дәл осы көзқарасты өзгертуге тырысып жатырмыз. Мысалы, “Вест Хэмге” қарсы ойында 60-минутта ауыс-түйіс жасадық, бұл ойынға әсер етті. Ал бұл жолы үзілістен кейін бірден ауыстыру жасадық. Мұның ешқашан ойыншыға қарсы бағытталмайтынын түсіну керек.
Кейде футболшыны жай ғана қорғау қажет. Мысалы, ойыншының сары қағазы бар делік. Эмоция шегіне жетеді. Екінші ескерту алуы мүмкін деп алаңдап, сондықтан оны ауыстырамыз. Кейде командаға құрылым мен тұрақтылық қосу үшін тактикалық шешім қабылдау қажет. Қосалқы құрам біздің командамыздың әлсіз тұсы емес, мықты қыры болуы керек. Біз жігіттерге осы ойды үнемі жеткізіп келеміз», — деді Хайен.
Сондай-ақ жаттықтырушы команданың жанкүйерлері қоятын талаптарға көзқарасы туралы айтты.
«“Бернли” жанкүйерлерінің талаптары? Олар сөзсіз дұрыс айтады. Барлығы Премьер-лигаға ұмтылады, бұл біздің де мақсатымыз болуы керек. Мұндай қысымды көтере білу қажет, ал мен үшін оның еш қиындығы жоқ. Олардың не күтетінін білемін. Сенің 95 минут бойы бар күшіңді салып, жеңді түріп жұмыс істеуіңді, мінез бен батылдық танытуыңды қалайды.
Біз мұны кей сәттерде көрсеттік, әсіресе “Вест Хэмге” қарсы екінші таймда. Бірақ бұған дейін айтқанымдай, біз қазір ғана команданы құрып жатырмыз. Құрамда физикалық тұрғыдан біз қалаған деңгейге әлі жетпеген көптеген жаңа ойыншы бар. Дегенмен, біз осы бағытта жұмыс істеп жатырмыз. Жанкүйерлермен байланысты жолға қою өте маңызды.
Біз гол соққан кезде жанкүйерлер бізді алға жетелейді. Бұл импульс тек трибунаға емес, ойыншыларға да беріледі. Бұл олар үшін өте маңызды белгі. Жанкүйерлер қолдаған кезде команданың деңгейі де көтеріледі», — деді жаттықтырушы.
«Бернли» — «Бристоль Сити» матчы сенбі, 5 қыркүйекте өтеді. Ойын сағат 19:00-де басталады (Қазақстан уақытымен).
Бұған дейін «Бернлидің» бас бапкері Дастан Сатпаев туралы пікір білдірген еді.
