«Бернли» жаттықтырушысы Дастан Сатпаевтың жарақатына қатысты алаңдатарлық жаңалық айтты
Англиялық «Бернли» клубының бас жаттықтырушысы Ники Хайен шабуылшы Дастан Сатпаевтың сапқа қайта қосылғаннан кейінгі жағдайы туралы айтты, деп хабарлайды Sports24.kz.
Жарақатынан айыққаннан кейін «Бернли» жаттықтырушылар штабы оның жүктемесін мұқият бақылап, алаңдағы минут санын арттыруға асықпай отыр.
Хайен Сатпаевтың ойын шеберлігінің арқасында қазірдің өзінде командаға пайдасын тигізіп жүргенін атап өтті.
«Ол біздің командамыз үшін өте маңызды. «Вулверхэмптонға» қарсы матчта ол 30 минут ойнай алды. Оның жылдамдығы, қарқыны, энергиясы және жеке әрекеттері көп, сондықтан ол командамыз үшін аса маңызды», - деді жаттықтырушы.
Сонымен қатар жаттықтырушы алдағы уақытта қазақстандық футболшы алаңда бұдан әлдеқайда көп уақыт өткізеді деп үміттенеді. Клуб шабуылшының артық тәуекелге бармай, толыққанды ойын ырғағына қайта оралуы үшін жүктемені кезең-кезеңімен арттыруды жоспарлап отыр.
«Дегенмен оның 30 минуттан көп ойнай алатынына үміттенемін. Алдымен бұл 45 минут болады, кейін 60 минутқа жетеді, одан соң, меніңше, ол матчты толық өткізе алады», - деп қосты Хайен.
Еске салайық, қыркүйек айында Сатпаев «Бернли» мен «Мидлсбро» арасындағы матчта (1:1) санның артқы бұлшықетінен жарақат алған еді. Осыған байланысты 18 жастағы футболшы Ұлттар лигасында ұлттық құраманың төрт кездесуін өткізіп алды. Олсыз команда Молдова мен Словакиядан жеңіліп, Фарер аралдарымен екі рет тең түсті.
Қазан айында қазақстандық футболшы жарақатынан айығып, «Уотфордқа» қарсы ойында алаңға қайта оралды. Кейін «Челсидің» тыйым салуына байланысты бір матчты өткізіп алды, алайда «Вулверхэмптонға» қарсы соңғы кездесуде қайтадан алаңға шықты.
