Уразбахтин «Қайраттан» кеткеннен кейін мансабы бойынша шешім қабылдады
«Қайраттың» бұрынғы бас бапкері Рафаэль Уразбахтин жұмысқа қайта оралуға асықпайды. Ол жаңа ұсыныстарды қарастырмас бұрын футболдан демалып алмақ, деп хабарлайды Sports24.kz.
AmanVIBE мәліметінше, 47 жастағы маман жаттықтырушылық мансабында үзіліс жасауды жоспарлап отыр. Демалғаннан кейін ол шетелдік клубтарда жұмысын жалғастыру нұсқаларын қарастырмақ.
Осылайша, жақын арада Уразбахтин Қазақстанның басқа командасын басқару мүмкіндігін қарастырмайды. Оның алдағы мансаптық жоспарлары елден тыс жердегі жұмыспен байланысты болуы мүмкін.
Уразбахтин кім?
Рафаэль Уразбахтин 1978 жылғы 20 қарашада Алматыда дүниеге келген. Футболшы ретіндегі кәсіби мансабын 1996 жылы «Қайнар» сапында бастады. Ол Қазақстанның «Ұлытау», «Қайрат», «Елімай», «Ақтөбе-Ленто», «Жетісу», «Шахтер», «Есіл-Богатырь», «Қайсар» және «Восток» клубтарында, сондай-ақ ресейлік «Ростсельмаш» командасында өнер көрсетті. 1998-2004 жылдар аралығында Қазақстан құрамасында ойнап, 12 матч өткізіп, екі гол соқты.
Ойыншылық мансабын аяқтағаннан кейін жаттықтырушылық қызметке ауысты. «Қайрат» академиясында, Қазақстан жастар құрамасының жаттықтырушылар штабында және Қарағандының «Шахтер» клубында жұмыс істеді. Сондай-ақ онда спорттық директор қызметін атқарды.
2024 жылғы қыркүйекте Уразбахтин «Қайраттың» негізгі командасын басқарды және оны Қазақстан чемпионы атандырды. 2025 жылы алматылықтар ел Суперкубогын жеңіп, тарихта алғаш рет Чемпиондар лигасының жалпы кезеңіне жолдама алды әрі Қазақстан чемпионы атағын қорғады.
Еске салайық, 26 қазанда Рафаэль Уразбахтин өз бастамасымен отставкаға кетті. Клуб басшылығы оның шешімін қабылдап, қызметтен кету туралы өтінішін қанағаттандырды.
