«Реал» Арбелоаның отставкаға кеткенін жариялады: Моуриньоны күтеміз бе?
Мадридтік «Реал» көптен күтілген шешім туралы жария етті — Альваро Арбелоа бас бапкер қызметінен кетті, деп хабарлайды Sports24.kz.
Испанияның қазіргі вице-чемпионы қысқа хабарламасында бұрынғы ойыншысына алғысын білдірді:
«Реал» Арбелоаға шынайы алғысын білдіреді. Ол академияға келген күнінен бастап клубта үнемі адалдық, жауапкершілік пен кәсібилік танытты.
Оның тұлғасы клубымыздың құндылықтарының жарқын үлгісі. «Реал» — әрдайым оның үйі болып қала береді, Арбелоаға және оның отбасына жаңа өмір кезеңінде үлкен табыстар тілейміз», — делінген «Реалдың» мәлімдемесінде.
Айта кетейік, Арбелоа «Реалды» 2026 жылдың басында Хаби Алонсо қызметінен кеткен соң қабылдады. Оның басшылығында «корольдік клуб» 28 матч өткізіп, 18 жеңіске жетті, екі кездесуде тең ойнап, сегіз рет жеңіліске ұшырады.
Дерлік расталғандай, оның орнына Жозе Моуриньо келеді.
