«Қорғаушымыз жиһаз сатады, тағы бірі электрик болып жұмыс істейді»: Фарер аралдары құрамасының футболшысы Қазақстанмен матчтан кейін күтпеген мәлімдем
Қазақстан мен Фарер аралдары құрамалары арасындағы УЕФА Ұлттар лигасы топтық кезеңінің төртінші тур матчы нәтижелі тең аяқталды (2:2), деп хабарлайды Sports24.kz.
Петропавлдық «Қызылжар» мен Фарер аралдары ұлттық құрамасының жартылай қорғаушысы Йоаннес Бьорталид Астанадағы ойыннан кейін ұлттық құрамдағы серіктестерінің күнделікті тұрмысы туралы ашық айтып берді.
«Біздің құрамда әлі күнге дейін әуесқойлар мен жартылай кәсіби футболшылар ойнайды. Кейбіреулері футболдан бөлек жұмыс істейді, оқиды немесе басқа іспен айналысады.
Мысалы, қорғаушымыз толық жұмыс күні еңбек етеді. Ол жиһаз сатады, ал оң қапталдағы қорғаушы таңертең электрик болып жұмыс істейді. Біздің командада футбол негізгі табыс көзі болып табылмайтын жігіттер әлі де көп».
Камбэк пен екі қызыл қағазға толы драма
Астанадағы матч алаң иелері үшін апатты сценарий бойынша өрбіді. Қонақтар 22-минутта Петур Кнудсеннің дәл соққысының арқасында есеп ашса, 63-минутта Геза Давид Тури аралдық команданың басымдығын еселей түсті. Бұрылыс сәті 65-минутта болды: қонақтардың қорғаушысы Мартин Агнарссон екінші ескертуін алып, алаңнан қуылды.
Сан жағынан басымдыққа ие болған Қазақстан құрамасы бірден қарқын қосты:
- 68-минут: Сергей Малый алыстан соққы жасап, есеп айырмасын қысқартты.
- 76-минут: Нұралы Әліп есепті теңестіріп, командасын ойынға қайта қосты.
Алайда соңғы шабуылды ұйымдастырып, жеңісті жұлып әкету мүмкін болмады. 85-минутта Сергей Малый тікелей қызыл қағаз алып, командалар құрамын теңестірді.
Турнирлік жағдай
4 турдан кейін Қазақстан құрамасы 2 ұпаймен С дивизионындағы өз тобының соңында тұр. Фарер аралдары мен Молдовада 4 ұпайдан, ал Словакия құрамасының еншісінде 7 ұпай бар.
