Енді Сатпаевсіз: «Қайраттың» «Қызылжарға» қарсы ойынына арналған құрамы
21 маусымда КПЛ-дің 14-турында Петропавлдың «Қызылжар» өз алаңында ел чемпионы – Алматының «Қайратын» қабылдайды, деп хабарлайды Sports.kz.
Бұл командалардың осы аптадағы екінші кездесуі болмақ. 17 маусымда «Қайрат» қарсыласын сенімді түрде ұтып, 3:0 есебімен ірі жеңіске жетті.
Рафаэль Уразбахтин ел чемпионының бастапқы құрамын жариялады. Айта кетейік, бұл алматылықтар үшін Дастан Сатпаевсыз өтетін алғашқы матч болмақ – ол «Челсиға» ауысып кеткен еді.
13 турдан кейін «Қайрат» турнир кестесінде 30 ұпаймен екінші орында келеді және «Ордабасыны» қуып жетуді жалғастыруда. Ал «Қызылжар» 15 баллмен 10-орында.
Кездесудің алғашқы ысқырығы Астана уақытымен 18:00-де естіледі. Ойынды Qazsport телеарнасынан және KFF League YouTube-арнасынан тікелей көруге болады.
