ВИДЕО: Сатпаевтың «Мидлсброға» қарсы матчтағы гол соғуға керемет мүмкіндігі
Қазақстан құрамасының вингері Дастан Сатпаев «Бернлидің» старттық құрамына кірді Чемпионшипте «Мидлсброға» қарсы матчта алаңға шықты. Кездесуде ол «клареттер» сапындағы алғашқы голына барынша жақын болды, деп хабарлайды Sports24.kz.
57-минутта Сатпаев допты алаңның орталық шеңберінде қабылдап, «Бороның» айып алаңына дейін рейд жасап, қақпаға соққы бағыттады. Алайда доп қарсылас қақпашысы Радек Витектің тура өзіне тиді.
Sofascore статистикалық платформасының мәліметінше, осы соққыдан кейінгі күтілетін голдар көрсеткіші (xG) 0.16-ны, ал қақпаға дәл бағытталған соққылардан кейінгі күтілетін голдар көрсеткіші 0.58-ді құрады.
Сатпаев соққыны «Бернли» есепті теңестіргеннен кейін небәрі төрт минут өткен соң жасады. 54-минутта Зеки Амдунидің пасынан кейін Уго Рагхубер Эйдан Морристің 23-минуттағы голына жауап ретінде есепті теңестірді.
Әзірге Қазақстан құрамасының вингері, алматылық «Қайраттың» бұрынғы ойыншысы Англияға көшкеннен кейінгі алғашқы голын іздеуде. Бұған дейінгі үш кездесуде ол гол соғып та, нәтижелі пас беріп те үлгермеді.
