«Нағыз күрескер»: жанкүйерлер Сәтпаевтың Лига кубогындағы ойынына тәнті болды
Қазақстандық вингер Дастан Сәтпаев өнер көрсететін «Бёрнли» Лига кубогынан сенсациялық түрде шығып қалды. Ағылшын клубы «Брэдфордтан» пенальти сериясында жеңілді. Соған қарамастан, 17 жастағы футболшы «Бёрнли» жанкүйерлерінен оң пікір алды, деп хабарлайды Sport24.kz.
Матчтың негізгі уақыты голсыз аяқталып, есеп 0:0 болды. Ал пенальти сериясында екінші лига өкілдері дәлдік танытып, «Бёрнлиді» турнирден шығарды.
Сәтпаев мансабында алғаш рет «Бёрнлидің» негізгі құрамында алаңға шығып, 80 минут ойнады. Осыдан кейін қазақстандық футболшы алмастырылып, пенальти сериясына қатысқан жоқ.
Дастан алаңда болған уақытында қақпаға екі рет соққы жасап, 86 пайыз дәл пас берді және сегіз жекпе-жекте жеңіске жетті. Жанкүйерлер оның белсенділігі мен доп үшін күресуге деген талпынысын ерекше атап өтті.
«Бәлкім, бұл кештегі жалғыз жарқын сәт Сәтпаев болды. Ол жігерлі көрінді, ал команданың қалған бөлігі көп сұрақ тудырды»;
«Сәтпаев — нағыз питбуль. Мен оны Серхио Агуэроға қарағанда Карлос Тевеспен көбірек салыстырар едім. Ол — нағыз күрескер», — деп жазды жанкүйерлер әлеуметтік желілерде.
«Брэдфордқа» қарсы матчта жаттықтырушылар штабы Сәтпаевты оң қанатта пайдаланды. Оның үстіне футболшы алаңда біршама терең орналасты. Кейбір жанкүйерлер қазақстандық ойыншыға шабуылдағы үйреншікті сол қанатта өз мүмкіндігін көрсетуге мүмкіндік беруге шақырып жатыр.
«Сәтпаев шабуылшы емес пе? Неліктен оны іс жүзінде оң қорғаушы ретінде пайдаланады?»;
«Келесі матчта Дастан Трезордың орнына сол қанатта ойнайды деп үміттенемін»;
«Сәтпаевтың аяқпен жұмыс істеуі өте жақсы, сонымен қатар ол үнемі қозғалыста жүреді. Маған оның ойыны қатты ұнайды», — деп жазды «Бёрнли» жанкүйерлері.
Жас қазақстандық футболшының ойын интеллектін жоғары бағалаған скауттардың бірі де өз пікірін білдірді.
