«Қайрат» жанкүйерлері «Атыраумен» матчтағы Анарбековтың қателігіне пікір білдірді
«Қайраттың» ҚПЛ-дың 13-турында «Атыраумен» тең түсуі алматылық клуб жанкүйерлерінің наразылығын тудырды.
Кездесудің 13-минутында алаң иелері есеп ашты. Юкка Оксанен айып алаңының сыртынан тамаша соққы жасап, «Қайратты» алға шығарды.
Алайда алматылықтар жеңісті есепті сақтап қала алмады. Ойынның 69-минутында қақпашы Темірлан Анарбеков өз айып алаңы маңында допты шығаруға тырысқан сәтте өрескел қателік жіберді. Мұны «Атырау» шабуылшысы Абдулла тиімді пайдаланып, допты қақпаға тоғытты - 1:1.
Sports24.kz тең ойыннан кейінгі жанкүйерлердің ең көп талқыланған пікірлерін жинады.
«Анарбековты негізсіз шығарды. Ол тағы бір ойыншымен негізгі құрамдағы орын үшін таласып жүр. Қазіргі «ҚАйрат» айып алаңына доп асырудан басқа не істей алады? Егер сол пастар голға айналса түсінер едік, бірақ нәтиже жоқ».
«15 күн демалды, бірақ неге сонша ауыр қозғалады? Анарбековты қосалқы құрамға отырғызу керек. Оның орнына Буч ойнасын».
«Тәрбиелік мақсатта Анарбековты кем дегенде бір ойынға қосалқы құрамда қалдыру керек еді. Мәселе оны алмастыратын адамның жоқтығында. Сондықтан Темірлан өзін ерекше сезінеді».
«Қақпашыда міндетті түрде бәсекелестік болуы керек. Анарбековта ондай жоқ. Бізге тәжірибелі қақпашы қажет. Былтыр оған көп жағдайда сәттілік серік болды».
«Анарбеков жарнамаларға көбірек түсе берсін. Осылай жалғаса берсе, жақында «Қайрат-Жастардың» өзінде қосалқы құрамда отырады».
«Анарбеков алғашқы минуттардан бастап қателесіп жүрді. Екі рет кешірілді, бірақ үшінші қателік тым қымбатқа түсті. Дегенмен сұрақ тек оған ғана емес, команданың басқа ойыншыларына да бар».
«Анарбеков өзін тым жоғары бағалап жіберген сияқты. Одан да негізгі құрамдағы орны үшін күрескені дұрыс болар еді».
«Жақсы қақпашы сияқты көрінеді, бірақ кейде оның балалық әрі ойланбай жасайтын қателіктерін түсіну қиын. Қақпашылар мектебінен қайта өту артық етпес еді».
«Бұрын қақпашылар шабуылды ұзын пастармен бастайтын. Қазір командалар өз қақпасының алдында допты қысқа паспен ойнатуды әдетке айналдырды. Мұның қаншалықты қауіпті екенін жаттықтырушылар көрмей ме? Анарбековты ауыстыру керек - ол бұрынғы деңгейінде емес».
«Бір жақсы матч өткізді де, бірден жарнамалар, сыйлықтар мен назар көбейді. Бірақ қақпадан шығуы сенімсіз, аяқпен ойнауы әлсіз. «Қайратқа»шұғыл түрде жаңа қақпашы керек».
«Атыраумен» болған тең ойыннан кейін «Қайрат» ҚПЛ турнирлік кестесіндегі екінші орнын сақтап қалды. Алматылық клубтың еншісінде 27 ұпай бар. Келесі кездесуін Рафаэль Уразбахтин шәкірттері 17 маусым күні «Қызылжарға» қарсы өткізеді.
