Димитар Димитров «Қайраттың» ЛЧ-дегі «Левскиге» қарсы ойынындағы мүмкіндігін бағалады
Павлодарлық «Ертістің» бұрынғы бас бапкері Димитар Димитров Sports24.kz тілшісіне берген сұхбатында УЕФА Чемпиондар лигасының үшінші іріктеу кезеңіндегі болгарлық «Левски» мен қазақстандық «Қайрат» арасындағы алдағы матчтың фаворитін атады.
«Айта аламын, өткен маусыммен салыстырғанда «Левски» күшейе түсті. Клуб сәтті трансферлік жұмыс жүргізді, команда агрессивті әрі жинақы ойнайды, барлық шепте мықты ойыншылары бар. Әрине, «Қайрат» өткен жылы Чемпиондар лигасының топтық кезеңінде өнер көрсетіп, қазақстандық клубтың өте мықты қарсылас екенін дәлелдеді. Бұл текетіресте мен 55-45 есебімен «Левскиге» басымдық берер едім», – деді Димитар Димитров.
Матч қашан өтеді?
«Қайрат» пен болгарлық клуб арасындағы алғашқы матч 4 тамыз күні Софияда өтеді. Кездесу Нұр-Сұлтан уақыты бойынша 22:30-да басталады. Қарымта ойын 11 тамыз күні сағат 20:00-де Түркістан қаласындағы «Түркістан Арена» стадионында өтеді.
Айта кетейік, «Левски» – Болгарияның қазіргі және 27 дүркін чемпионы, 26 мәрте Болгария кубогының иегері, үш рет Суперкубокты жеңіп алған.
«Қайрат» Чемпиондар лигасындағы жолын жалғастыруда
Алматылық «Қайрат» бұған дейін де басты еурокубоктың екінші іріктеу кезеңінен сүрінбей өткен еді. Кипрлік «Омониядан» алғашқы ойында 0:1 есебімен жеңілген Рафаэль Уразбахтиннің командасы өз алаңында қарымта матчта 1:0 есебімен жеңіске жетті. Қарсыласты анықтау пенальти сериясында шешілді, онда «Қайрат» 6:5 есебімен басым түсті.
Ойыннан кейін алматылықтардың бұрынғы шабуылшысы Жоау Пауло матчтан кейінгі пенальти сериясында өзін керемет көрсеткен Темірлан Анарбековтің ойынына тәнті болып, оған пенальти соғудан бас тартатынын мойындады.
