«Қазақстан футболы ұтылды» – «Астана» бас директоры Канье Уэсттің концерті үшін «Қайраттың» «шығарылуына» наразы
«Астана» футбол клубының бас директоры Алтай Даумов Sports24.kz-ке берген эксклюзивті сұхбатында америкалық әртіс Канье Уэсттің концертіне байланысты «Қайраттың» Чемпиондар лигасының үшінші іріктеу кезеңіндегі «Левски» (Болгария) командасына қарсы қарымта матчын Алматыдан Түркістанға ауыстыру шешіміне ашық наразылығын білдірді.
Мәселенің мәні неде?
Қазақстанның қазіргі чемпионы «Қайрат» бұған дейін 11 тамызда Чемпиондар лигасының үшінші іріктеу кезеңіндегі болгариялық «Левскиге» қарсы қарымта ойынын Түркістанда өткізетінін хабарлады. Команда Алматыдан көшуге мәжбүр болды, себебі 14 тамызда «сары-қаралардың» өз алаңында америкалық жұлдыз Канье Уэсттің концерті өтеді. Жағдайды ушықтыратыны – бірінші матчтың нәтижесі, сырт алаңда алматылықтар 0:1 есебімен жеңіліп қалды.
«Меніңше, бүкіл қазақстандық футбол ұтылды. Бұл жағдай бүкіл ойынның беделіне нұқсан келтіреді. Бұл – қандай да бір концентрация... Бір аптада шешім қабылдап, бекітіп жіберді. Әрине, Канье Уэст – жақсы әртіс, қызықты шара болары анық, бірақ футбол көп нәрседен ұтылады. «Қайрат» осының салдарынан Чемпиондар лигасынан шығып қалуы мүмкін. Оның үстіне, бірінші ойында соңғы минуттарда гол жіберіп алды, ал жанкүйерлердің қолдауы, өз алаңы бұл жағдайды түзеуге көмектесер еді, енді Түркістанда әлдеқайда қиын болады. Бүкіл индустрия ұтылады. Елестетіңіз, 8 Чемпиондар лигасы матчы болуы мүмкін еді, бірақ осының кесірінен «Қайрат» Конференциялар лигасына түсуі ғажап емес. Сонда бір ғана Канье Уэсттің концерті және Алматыдағы 4 үй матчынан айырыламыз. «Қайраттың» басымдығы, өз алаңының факторы бар еді, бірақ біз оны қарсыласқа беріп қойдық. «Левски» – өте мықты команда, болгар клубы тіпті өз алаңынан шығуға мүмкіндік бермеді. Енді «Қайрат» бөтен алаңда, бөтен қалада ойнайды, бұл команданың келесі еурокубок кезеңіне өту мүмкіндігін төмендетеді. Бұл – қазақстандық футбол үшін өте өкінішті», – деді Алтай Даумов.
Стадионнан айырылу жағдайын біз бұған дейін Sports24.kz-тің Youtube-арнасындағы подкастың жаңа шығарылымында белгілі блогер Артур Аскарұлы, яғни archibaaall-мен бірге егжей-тегжейлі талқыладық. Сарапшы «Қайраттың» стадионды неге Канье Уэстке бергені туралы өз пікірін білдірді.
Айта кетейік, матч Қазақстандағы ең заманауи стадиондардың бірі – «Түркістан Аренада» өтеді. Бұл стадион 2020 жылы салынған және УЕФА инспекциясынан кейін екінші санатқа ие болды. «Қайрат» «Левскиге» қарсы ойнайтын қала жайлы толық ақпаратты материалымыздан оқи аласыздар.
