Билет, ұшу, баспана және көлік: Қазақстаннан Сатпаевтың ойынын көруге бару қанша тұрады?
Дастан Сатпаевтың Англияға қоныс аударуымен қазақстандық жанкүйерлердің «Бернли» матчтарына деген қызығушылығы айтарлықтай артты, сондықтан кейбірі ойындардың бірін стадионнан тамашалауды ойлауы мүмкін. Sports24.kz сапарға шығу кезінде қандай шығындарға дайын болу керегін есептеп көрді.
Виза мәселелері
Қазақстан мен Ұлыбритания арасында визасыз режим жоқ, сондықтан Ұлыбританияға баратын Қазақстанның барлық азаматтары виза алуы қажет. Британ билігі визаға сапардан үш ай бұрын өтініш беруге кеңес береді.
Визаға тікелей Ұлыбританияның Астанадағы елшілігінде, сондай-ақ Алматы, Астана және Атыраудағы VFS Global визалық орталықтары арқылы делдалдардың қызметін пайдаланып өтініш беруге болады. Визаның құны — 190 доллар немесе 87 мың теңге, алайда делдалдар қосымша ақы алуы мүмкін.
Құжаттарды тапсыру кезінде сұхбаттан да өту қажет болады. Онда сапардың мақсатын және жанкүйердің сапарға жетерліктей қаражаты бар екенін растау керек.
Қазақстаннан ұшу
Бернлиде халықаралық әуежай жоқ, сондықтан матч өтетін қалаға қандай да бір жерден ауысып отыру арқылы жетуге тура келеді. Ең жақын әуежай Манчестерде орналасқан, бірақ ол Қазақстанның әуежайларымен тікелей байланыспаған.
Ең оңтайлы нұсқа — Ыстамбұл арқылы ұшу. Астанадан ұшатын болсаңыз, барып-қайту рейсі кем дегенде 390 мың теңге тұрады.
Манчестерден Бернлиге және кері бағытта пойызбен 16 еуроға (8500 теңге) жетуге болады. Жолға 45 минут кетеді. Автобус арзанырақ — жеті еуро (3700 теңге), бірақ жол шамамен екі сағатқа созылады.
Бернлиде тұру
Бернли ірі туристік орталық емес, сондықтан Ұлыбритания үшін ондағы тұру бағалары қолжетімді деуге болады. Апартаменттерді екі адамға екі түнге 35 мың теңгеге де, стадионның дәл жанынан 71 мың теңгеге де жалдауға болады. Қонақүйлер сәл қымбатырақ — екі түнге 100-ден 175 мың теңгеге дейін.
- Сондай-ақ оқыңыз: Тұрғын үй жалдауынан мейрамханадағы кешкі асқа дейін: Дастан Сәтпаев ойнайтын Бернлиде өмір сүру қанша тұрады?
Футбол билеттері
«Бернлидің» АПЛ-ден түсіп қалуы билеттер бағасының төмендеуіне себеп болды. «Клареттердің» Чемпионшиптегі матчына 30 фунттан (18 мың теңге) басталатын бағамен баруға болады. Егер делдалдардың қызметін пайдалансаңыз, билет үшін 75-130 еуро (45-80 мың теңге) төлеуге тура келеді.
Бернлидегі қоғамдық көлік
Бернлидегі қоғамдық көлікте бір рет жүру үш фунт немесе 1800 теңге тұрады. Сондай-ақ 12 фунтқа (7400 теңге) тәуліктік жол жүру билетін сатып алып, көлікті шектеусіз пайдалануға болады. Оның үстіне бұл билет Манчестерде де жарамды.
Қорытындылай келе, сапарға кем дегенде 600 мың теңге жұмсауға тура келеді. Алайда қалта шығындары мен басқа да ықтимал шығындарға арнап қосымша қаражат дайындаған жөн.
