Жаслан Жумашев Қазақстан құрамасынан Байсуфиновтың кетуіне пікір білдірді
Қостанайлық «Тобыл» командасының жартылай қорғаушысы Жаслан Жумашев Sports24.kz порталына эксклюзивті сұхбатында ұлттық құраманың бас бапкері Талғат Байсуфиновтың қызметінен кетуіне қатысты өз ойын айтты, деп хабарлайды Sports24.kz.
«Талғат Байсуфиновқа деген құрметім ерекше. Дәл осы кісінің басшылығында Қазақстан құрамасында алғаш рет алаңға шықтым. Ол маған сенім артып, өзімді көрсетуге мүмкіндік берді. Оған алдағы мансабында сәттілік тілеймін, бұл адамға деген құрметім әрдайым жоғары болады. Ұлттық құраманың намысын қорғау бақытына ие еткеніне шын жүректен ризамын», - деді Жаслан Жумашев.
Талғат Байсуфиновтың жұмысы несімен есте қалды?
Бұған дейін Қазақстан футбол федерациясы бас бапкердің отставкаға өтініш бергенін және елдің басты футбол органы бұл шешімді қабылдағанын хабарлаған. Талғат Байсуфинов өткен жылдың қазан айында Қазақстан құрамасының бас бапкері қызметіне қайта оралды. Оның жетекшілігімен ұлттық құрама 2026 жылғы әлем чемпионатының іріктеу кезеңінде үш матч өткізіп, бірде-бір рет жеңілген жоқ. Лихтенштейнді ірі есеппен жеңіп, одан кейін Солтүстік Македония және Бельгия құрамаларынан ұпай тартып алды. Байсуфиновтың қызметінен кетерінің алдында Қазақстан құрамасы Венгриямен өткен жолдастық кездесуде 1:3 есебімен жеңілді.
Алдағы жоспар қандай?
ҚФФ өкілдері жаттықтырушылар штабының толықтырылуы жөнінде қосымша хабарланатынын мәлімдеді. Ұлттық құраманың алдағы матчтарға дайындығы әдеттегідей жалғасады.
