Виктор Вальдес «Қайсарды» тізгіндеуі мүмкін: «Барселонаның» бұрынғы қақпашысы үміткерлер тізіміне енді
«Барселона» мен Испания құрамасының бұрынғы қақпашысы Виктор Вальдес мансабын Қазақстанда жалғастыруы мүмкін. Испаниялық маман «Қайсардың» бас бапкері қызметіне үміткерлер қатарына енді, деп хабарлайды Sports24.kz ASI Inside инсайдеріне сілтеме жасап.
Дереккөздің мәліметінше, Андрей Ферапонтов кеткеннен кейін қызылордалық клуб басшылығы жаңа жаттықтырушы іздеуге кіріскен. Қазіргі таңда «Қайсардың» бас бапкері қызметіне бес шетелдік маман үміткер. Олардың арасында Еуропа футболына жақсы таныс есімдер де бар.
Ең көп назар аудартып отырған кандидаттардың бірі - Виктор Вальдес. Ол ойыншылық мансабының басым бөлігін «Барселонада» өткізіп, каталониялық клубпен бірнеше рет Испания чемпионы атанды және Чемпиондар лигасын үш мәрте жеңіп алды. Кәсіби мансабын аяқтағаннан кейін испаниялық маман бапкерлікке бет бұрды.
Дегенмен Қызылордада әзірге түпкілікті шешім қабылданған жоқ. Инсайдердің ақпараты бойынша, клуб бірден бірнеше маманмен келіссөз жүргізіп жатыр. Жаңа бас бапкерге қатысты нақты шешім жақын күндері белгілі болуы мүмкін.
«Қайсардағы» бапкерлік ауыс-түйіс команда үшін оңай өтіп жатқан жоқ маусыммен тұспа-тұс келді. Өткен турда қызылордалықтар Қазақстан Премьер-лигасының 24-туры аясында өз алаңында «Оқжетпесті» қабылдап, 2:3 есебімен жеңіліп қалды.
Осы нәтижеден кейін «Қайсар» 20 ұпаймен турнир кестесінің төменгі бөлігінде қалып отыр. Чемпионаттың аяқталуына санаулы тур ғана қалғандықтан, клубтың басты міндеттерінің бірі - Премьер-лигадағы орнын сақтап қалу.
Соған қарамастан, қызылордалықтар маусымды жүлдемен аяқтау мүмкіндігін әлі де сақтап отыр. Чемпионаттағы қиын жағдайға қарамастан, «Қайсар» Қазақстан кубогының финалына дейін жетті. 2026 жылдың қарашасында өтетін шешуші кездесуде команда «Ордабасымен» кездеседі.
