«Оқжетпес» бес гол соғылған матчта «Қайсарды» қиындықпен жеңді
Көкшетаулық «Оқжетпес» Қазақстан Премьер-лигасының 24-туры аясында сырт алаңда «Қайсарды» 3:2 есебімен жеңді, деп хабарлайды Sports24.kz.
Қонақтар кездесуді белсенді бастап, алғашқы таймның өзінде екі доп айырмасымен алға шықты. 21-минутта Оралхан Өміртаев есеп ашса, арада жеті минут өткенде Нұрғайни Бөрібаев «Оқжетпестің» басымдығын арттырды.
«Қайсар» үзіліске дейін ойынға қайта оралды. 39-минутта Нұралы Жақсылық есеп айырмасын қысқартып, алаң иелерінің екінші таймдағы мүмкіндігін сақтап қалды.
Үзілістен кейін «Оқжетпес» тағы да қарқынын күшейтті. 69-минутта Борис Лотоцкий қонақтардың үшінші голын соқты. Төрт минуттан кейін Рамазан Бағдат есеп айырмасын қайтадан бір допқа дейін қысқартты, бірақ қызылордалықтар таразы басын теңестіре алмады.
Қазақстан Премьер-лигасы. 24-тур
«Қайсар» – «Оқжетпес» – 2:3 (1:2)
Голдар: Өміртаев, 21 – 0:1; Бөрібаев, 28 – 0:2; Жақсылық, 39 – 1:2; Лотоцкий, 69 – 1:3; Бағдат, 73 – 2:3.
Осы жеңістен кейін «Оқжетпес» 39 ұпай жинап, бұл көрсеткіш бойынша «Астанамен» теңесті. Дегенмен елордалық команданың екі ойыны кем. Ал 20 ұпайы бар «Қайсар» чемпионат аутсайдерлерінің қатарында қалып отыр.
24-турдың тағы бір кездесуінде «Ордабасы» өз алаңында «Қызылжарды» 3:0 есебімен сенімді жеңді. Шымкенттік команда сапында Лео Натель, Давид Абагна және Эвертон гол соқты.
