Молдовада Ұлттар лигасындағы Қазақстанмен матчқа қатысты пікір білдірді
Молдова құрамасының бұрынғы футболшысы Виорел Фрунзе Ұлттар лигасындағы Қазақстанға қарсы алдағы матчқа баға беріп, қазақстандық команда екінші рет жеңілуге жол бере алмайтынын айтты, деп хабарлайды Sports24.kz MOLDOVA.sports.md-ке сілтеме жасап.
Бұрынғы ойыншының пікірінше, өз алаңында 1:2 есебімен жеңілгеннен кейін Қазақстан құрамасы тактикасын өзгертіп, қарымта кездесуде сақ ойнайды.
«Менің ойымша, Қазақстан құрамасы басқа футбол ойнайды. Өз алаңындағы матчта қазақстандықтар шабуылдауға, агрессивтірек әрекет етуге мәжбүр болды, ал біз көбіне қарымта шабуылдарға иек арттық. Енді, меніңше, Қазақстан қорғанысқа көбірек көңіл бөліп, тәуекелге аз барады. Олар Молдоваға екі рет жеңілуге жол бере алмайды», - деді Фрунзе We Sport арнасындағы Repriza cu Dorian Jereghi бағдарламасында.
Сондай-ақ бұрынғы футболшы Қазақстанның қаржылық мүмкіндіктері мен футбол инфрақұрылымының деңгейі Молдовадан жоғары екенін атап өтті.
«Қазақстан футбол тұрғысынан анағұрлым дамыған ел, олардың қаржысы көбірек. Онда Молдова сияқты шағын елдерді жеңуге міндеттіміз деп санайды. Қазақстандықтар өз алаңында гол жіберіп алғаннан кейін, барынша шабуылдауға мәжбүр болды. Бұл қажет еді, өйткені жанкүйерлер стадионға келіп, нәтижені көргісі келеді. Меніңше, олар былай пайымдайды: егер Молдованы жеңе алмасақ, онда бұл топта кімді жеңе аламыз?» - деп қосты Виорел.
Молдова мен Қазақстан құрамалары арасындағы қарымта кездесу 13 қарашада Кишиневте өтеді. 2 қазанда Астанада өткен алғашқы ойында Молдова құрамасы 2:1 есебімен жеңіске жетті.
Айта кетейік, Виорел Фрунзе ҚПЛ-де өнер көрсеткен. 2010 жылы ол «Атырауға» ауысып, команда сапында 29 матч өткізіп, 7 гол соқты. Кейін Беларусьтің «Неман» клубында ойнаған шабуылшы Қарағандының «Шахтёр» командасына қосылып, 8 матчқа қатысты, бірақ гол соға алмады.
