Қазақстан құрамасының Ұлттар лигасындағы қалған матчтары қашан өтеді
Қазақстан ұлттық құрамасы УЕФА Ұлттар лигасының топтық кезеңіндегі шешуші кездесулерге дайындалуда. Қараша айында Джон ван ’т Схиптің шәкірттері екі ойын өткізеді. Бұл матчтардың нәтижесі команданың С дивизионындағы үшінші топта қай орын алатынын анықтайды, деп хабарлайды Sports24.kz.
Қазақстандық футболшылар алдымен Молдова құрамасымен кездеседі. Бесінші турдағы ойын 13 қарашада Кишинев қаласындағы «Зимбру» стадионында өтеді. Матч Қазақстан уақытымен сағат 22:00-де басталады.
Бұл кездесу ұлттық құрама үшін қазан айындағы жеңілістің есесін қайтаруға мүмкіндік болмақ. Үшінші турда Қазақстан Молдованы Астанада қабылдап, 1:2 есебімен ұтылған еді. Енді қарсыластар Лилиан Попеску жаттықтыратын команданың алаңында қайта кездеседі.
Топтық кезеңнің соңғы матчы 16 қарашаға жоспарланған. Бұл күні қазақстандық футболшылар «Астана Аренада» Словакия құрамасын қабылдайды. Ойын Қазақстан уақытымен сағат 20:00-де басталады.
29 қыркүйекте Кошицеде өткен алғашқы кездесуде словактар 2:1 есебімен жеңіске жеткен болатын. Осылайша, ван ’т Схиптің шәкірттері топтық кезеңді биылғы турнирде өздерінен басым түскен екі қарсыласқа қарсы матчтармен аяқтайды.
Қазақстан құрамасы Ұлттар лигасында қалай өнер көрсетіп жатыр?
Төрт турдан кейін Қазақстан құрамасы өз тобында екі ұпаймен соңғы, төртінші орында тұр. Ұлттық команда екі ұпайын да Фарер аралдарымен өткен кездесулерде жинады.
Қазақстан турнирді Фарер аралдарымен сырт алаңдағы 1:1 есебіндегі тең нәтижемен бастады. Одан кейін Словакия мен Молдоваға бірдей 1:2 есебімен жол берді. Төртінші турда Астанада Фарер аралдарын қабылдап, 2:2 есебімен тең түсті.
Топ көшбасшысы – 10 ұпай жинаған Словакия. Бұл құрама әзірге бірде-бір кездесуде жеңілген жоқ. Ал Фарер аралдары мен Молдованың еншісінде төрт ұпайдан бар. Олар тиісінше екінші және үшінші орындарды бөлісіп тұр.
Демек, Қазақстан ең жақын қарсыластарынан екі ұпайға қалып келеді. Сондықтан қарашадағы кездесулердің маңызы зор. Ұлттық командаға турнир кестесіндегі жағдайын жақсартып, топтық кезеңді соңғы орыннан жоғары аяқтау үшін ұпай жинау қажет.
Топ жеңімпазы В дивизионына тікелей жолдама алады. Ал екінші орын иегері жоғары дивизионға көтерілу үшін өтпелі матчтарға қатысады.
