ҚФФ ҚПЛ матчындағы жанжалдан кейін «Ақтөбе» мен «Ордабасыны» жазалады
Қазақстан футбол федерациясының бақылау-тәртіптік және этика комитеті Премьер-лиганың 23-туры аясында өткен «Ақтөбе» – «Ордабасы» матчының қорытындысы бойынша шешім шығарды. Екі клубқа да айыппұл салынды, санкция актобелік команданың бас бапкеріне де қатысты, деп хабарлайды Sports24.kz.
Ең қатаң жаза «Ақтөбеге» тағайындалды. Клуб матчты тиісті деңгейде ұйымдастырмағаны және қауіпсіздік талаптарын бұзғаны үшін 300 АЕК көлемінде айыппұл төлеуге міндеттелді. Бұған актобелік клуб директорының төрешілер киім ауыстыратын бөлмесіне рұқсатсыз кіріп кетуі себеп болды.
Бұдан бөлек, «Ақтөбе» жанкүйерлерінің ресми тұлғаларға тіл тигізіп, қарсылас команданы қорлаған бейәдеп сөздер айтқаны үшін тағы 200 АЕК айыппұл төлеуі керек.
«Ақтөбенің» бас бапкері Игорь Черевченко де санкцияға ілікті. Маманды беделге нұқсан келтіретін сипаттағы мәлімдемелері үшін 50 АЕК көлемінде айыппұл жазасына тартты.
Ал «Ордабасыға» 60 АЕК көлемінде айыппұл салынды. Бұған команданың киім ауыстыратын бөлмеден кеш шығуына байланысты матчтың үш минутқа кеш басталуы себеп болған.
Жанжал неден шықты?
«Ақтөбе» «Ордабасыға» қарсы матч кезінде трибуналарда қорлайтын жазуы бар баннер мен Өзбекстан туы пайда болғаннан кейін жанжалдың ортасында қалды.
Полиция плакатты дайындауға қатысы бар адамдарды — кәмелетке толмаған қыздарды анықтады. Олармен және ата-аналарымен профилактикалық түсіндіру жұмыстары жүргізіліп, ересектер әкімшілік жауапкершілікке тартылды.
Матч «Ордабасының» 3:1 есебіндегі жеңісімен аяқталды. Кездесу төрешілердің шешімдеріне қатысты даулы сәттермен де есте қалды. Атап айтқанда, 73-минутта «Ақтөбенің» голы есепке алынбады.
28 матчтан кейін «Ордабасы» 67 ұпай жинап, ҚПЛ турнир кестесінде көш бастады. «Қайрат» бір ойыны кем бола тұра, жеті ұпайға қалып келеді. Ал 45 ұпайы бар «Ақтөбе» бесінші орында тұр.
«Ақтөбе» «Ордабасыға» қарсы матчтағы плакатқа қатысты жанжалдан кейін қыздардың айыппұлын төлейді
