Флик Энрикенің ПСЖ бапкері ретіндегі мықты тұсын атады
«Барселонаның» бас бапкері Ханси Флик Луис Энрикенің ПСЖ-дағы жұмысын жоғары бағалады, деп хабарлайды Sports24.kz.
20-нан 21 қазанға қараған түні каталондықтар мен париждіктер Чемпиондар лигасының жалпы кезеңіндегі 3-турда кездеседі. Матч Қазақстан уақытымен 00:00-де басталады.
– Луис Энрике туралы бапкер ретінде не ойлайсыз? Ол әсіресе қай қырымен мықты?
– Ол қатарынан екі рет Чемпиондар лигасының титулын жеңіп алды. Оның командасы керемет футбол көрсетіп жүр. Мен оны тамаша бапкер, әлемдегі үздіктердің бірі деп санаймын. Маған оның командасының динамикасы мен қарқындылығы қатты ұнайды. Олардың прессинг жасап, ротацияны қаншалықты белсенді қолданатынына назар аударыңыз. Ойыншылар үнемі позицияларымен ауысып отырады. Команда өте икемді. Осындай жоғары деңгейде бұл маған ерекше ұнайды. Оның осы жылдар ішінде клуб пен команданы қалай дамытқаны таңғаларлық. Ол керемет жұмыс атқарып жатыр.
– Алдағы матчтан не күтесіз? Сіз үшін бұл мерзімінен бұрынғы финал ма, әлде команданың Чемпиондар лигасында қаншалықты алысқа бара алатынын көрсететін дайындық ойыны ма?
– Алдағы матч біз үшін қазіргі деңгейіміздің қандай екенін көрсететін тамаша сынақ болады. Мен командамның батыл әрі сенімді ойнап, біртұтас ұжым ретінде әрекет еткенін қалаймын. Алдыңғы он бір матчта солай ойнадық. Біз әлемдегі ең үздік командалардың біріне қарсы шығамыз. Соңғы екі жылға қарайтын болсақ, бәлкім, ең үздігіне қарсы ойнайтын шығармыз. Бұл – өз деңгейімізді көрсету үшін бізге берілген тамаша мүмкіндік. Өз мүмкіндіктерімізді бағалап, тағы қай тұста дамуымыз керектігін түсінеміз. Менің ойымша, бұл матч бізге көптеген сұрақтың жауабын береді.
– Сіз үшін қайсысы маңыздырақ: Класико ма, әлде ПСЖ-ға қарсы алдағы матч па?
– Әрдайым ең маңызды матч – келесі матч. Демек, бұл жолы ең маңыздысы – ПСЖ-ға қарсы ойын.
– Сіздің ойыңызша, «Барса» мен ПСЖ арасындағы басты айырмашылық неде?
– Меніңше, олар әлдеқайда тәжірибелі. Соңғы жылдары біртұтас команда ретінде айтарлықтай өсті. Бірге қол жеткізген нәтижелері таңғаларлық. Бұл әр матчта көрініс табады. Тіпті «Страсбурмен» өткен соңғы ойында да олар кездесудің барысын соңғы 10 минутта өзгертіп жіберді. Бұл – олардың деңгейінің көрсеткіші. Олардың негізгі құрамда да, қосалқы құрамда да таңдаулы ойыншылары өте көп. Бұл – керемет команда!
2026/27 жылғы Чемпиондар лигасы маусымының басында «Барселона» «Фейеноордты» (5:1) және «Галатасарайды» (4:1) жеңді, ал ПСЖ «Слованды» (6:1) талқандады және «Манчестер Ситиден» (4:2) басым түсті.
