Шешуші сәт жақын: маусымның аяқталуына екі тур қалғанда ҚПЛ турнирлік кестесі
«Ордабасы» 28 матчтан кейін Қазақстан Премьер-лигасында сенімді көш бастап келеді, деп хабарлайды Sports24.kz тілшісі.
ҚПЛ-дың кейінге шегерілген 23-турының кездесулері аяқталды. Өткен демалыс күндері чемпионат көшбасшылары бірдей жеңіске жетті. «Ордабасы» «Ақтөбені» 3:1 есебімен жеңсе, «Қайрат» «Ертісті» ойсырата ұтты (5:0).
Андрей Мартиннің командасы маусымның аяқталуына екі тур қалғанда басты қуғыншысынан төрт ұпайға озып тұр. Осылайша, егер «Орда» 24 қазанда «Жеңісті» жеңсе, «Қайраттың» «Ақтөбеге» қарсы матчтағы нәтижесіне қарамастан, чемпиондықты мерзімінен бұрын жеңіп алады.
Турнирлік кестеде үшінші орында «Астана» тұр. «Каспиймен» болған тең ойыннан кейін (2:2) елордалық команда төртінші келе жатқан «Оқжетпестен» төрт ұпайға алда.
Үздік бестікті «Ақтөбе» түйіндеп тұр. Игорь Черевченконың командасы 45 ұпай жинаған. Ақтөбеліктердің желкесінен дем алып келе жатқан «Елімайда» 44 ұпай бар.
Тірі қалу жолындағы күрестің шешімі күтпеген жерден өрбуі мүмкін.
- «Атырау» - 27 ұпай;
- «Қызылжар» - 27;
- «Алтай» - 26;
- «Ертіс» - 26;
- «Жетісу» - 25;
- «Қайсар» - 24.
