«Бұл – жаңа сынақ» – «Сабах» жаттықтырушысы Чемпиондар лигасындағы «Боруссиямен» матч алдында
Сейсенбі, 20 қазанда, құрамында қазақстандық Стас Покатилов өнер көрсететін әзербайжандық «Сабах» Чемпиондар лигасы жалпы кезеңінің үшінші туры аясындағы матчта Дортмундтың немістің «Боруссиясымен» кездеседі, деп хабарлайды Sports24.kz.
Кездесу Бакудегі Олимпиада стадионында өтеді. Матч Қазақстан уақытымен 21:45-те басталады.
Ойын алдында бакиндік клубтың бас бапкері Валдас Дамбраускас алдағы матчтан күтерін айтып, қарсыластың жоғары қарқындағы прессингіне тоқталды.
«Жалпы кезеңдегі әр матч бізге сабақ беріп, жаңа тәжірибе сыйлайды. Ертеңгі күн де бұдан тыс қалмайтынына сенімдімін. Бұл – жаңа сынақ. Олар прессинг кезінде өте жылдам қимылдайды», – деді маман.
Сондай-ақ литвалық маман Дортмундтың «Боруссиясының» деңгейін бағалап, оның командасын өте күрделі сынақ күтіп тұрғанын атап өтті.
«Біз тамаша ойын көрсетуіміз керек. Дортмунд соңғы екі матчта гол соққан жоқ, алайда бұл олардың жағдайды түзетуге бұрынғыдан да зор жігермен келетінін білдіреді. «Боруссия» – Германиядағы ең үздік клубтардың бірі әрі өзіндік болмысы бар әлемдегі ең ұлы командалардың бірі. Біз аса ауыр тартысқа дайынбыз», – деп қосты Валдас Дамбраускас.
Екі турдан кейін екі команда да үш ұпайдан жинады. Жалпы кезеңдегі алғашқы матчта «Сабах» ағылшындық «Манчестер Юнайтедтен» 0:4 есебімен жеңілді. Алайда кейін өз алаңында чехиялық «Славияны» 2:0 есебімен ұтты.
«Боруссия» турнирді испаниялық «Вильярреалды» өз алаңында 3:2 есебімен жеңуден бастады. Бірақ екінші турда сырт алаңда норвегиялық «Буде-Глимттен» 0:1 есебімен жеңіліп қалды.
«Сабах» сапында Қазақстан құрамасының қақпашысы Стас Покатилов өнер көрсетеді. Қақпашы әзербайжандық клубтың турнирдің жалпы кезеңіндегі алдыңғы екі матчына да қатысты.
Стас Покатилов пен «Сабахтың» Чемпиондар лигасындағы «Боруссияға» қарсы шайқасы: онлайн көру
