Дембеле тарихты қайта жазды. «Реалға» қарсы бұлай ешкім жылдам ойнамаған
2025 жылғы клубтар арасындағы әлем чемпионатының жартылай финалында Усман Дембеле өз есімін еуропалық футбол тарихына алтын әріптермен жазды. Франциялық шабуылшы мадридтік «Реалға» қарсы небәрі тоғыз минут ішінде бір гол соғып, бір нәтижелі пас беріп, ерекше көрсеткішке қол жеткізді.
Opta статистикалық порталының мәліметінше, Дембеле - 2002/03 жылғы маусымнан бері «Реалға» қарсы ресми матчта алғашқы 9 минутта гол мен ассист жасаған алғашқы футболшы. Бұл рекорд бұған дейін 20 жыл бойы жаңармаған болатын.
Ойынның 6-минутында Дембеле Фабиан Руиске нәтижелі пас шығарып, есеп ашылуына ықпал етті. Ал үш минуттан кейін өзі Тибо Куртуа қорғаған қақпаны дәл көздеп, ПСЖ-ның басымдығын еселей түсті.
Осылайша, Дембеленің жарқын ойыны ПСЖ-ға жартылай финал басталысымен-ақ ойын тізгінін қолға алуға мүмкіндік берді.
Айта кету керек, бұл - Дембеленің 2025 жылғы маусымдағы 35-ші голы. Бұл көрсеткіш оны әлемдегі ең нәтижелі ойыншылардың бірі ретінде тағы бір мәрте дәлелдеп отыр.
