Ақыры жүзеге асты: Германия 2014 жылдан бері алғаш рет әлем чемпионатының плей-оффына жолдама алды
Германия құрамасы 2026 жылғы әлем чемпионатының плей-офф кезеңіне мерзімінен бұрын жолдама алды, деп хабарлайды Sports.kz.
Е тобындағы екінші тур матчында немістер Кот-д’Ивуар құрамасын 2:1 есебімен жеңді. Кездесудің басты кейіпкері Дениз Ундав болды. Ол екі гол соғып, өз командасына маңызды жеңіс сыйлады.
Осылайша, Германия қатарынан екінші жеңісіне қол жеткізіп, алты ұпаймен Е тобының көшін бастады. Бұл нәтиже немістерге плей-офф кезеңіндегі орнын алдын ала қамтамасыз етуге мүмкіндік берді.
Германия құрамасы үшін бұл әлем чемпионатындағы плей-оффқа 2014 жылдан бергі алғашқы жолдама болды. Бұған дейін 2018 және 2022 жылғы мундиальдарда немістер топтық кезеңнен аса алмаған еді.
Айта кетейік, Германия соңғы рет 2014 жылы әлем чемпионатының плей-офф кезеңінде ойнап қана қоймай, турнир жеңімпазы атанған болатын. Финалда немістер Аргентинаны 1:0 есебімен жеңіп, төртінші мәрте әлем чемпионы атанды.
