«Қайрат» ҚПЛ кестесінде екінші орында қалды: алматылықтардың қанша ұпайы бар?
Қазақстан Премьер-лигасының 27-туры аяқталды. Екі ойын күнінде командалар сегіз матч өткізіп, тур нәтижелері чемпиондық бәсекеге де, ҚПЛ-дағы орнын сақтап қалу жолындағы тартысқа да айтарлықтай әсер етті, деп хабарлайды Sports24.kz.
Турдың басты матчтарының бірі Астанада өтті. Елордалық клуб «Қайратты» 1:0 есебімен жеңді. Алматылықтар 11-минутта Әділет Садықбеков алаңнан қуылғаннан кейін он ойыншымен қалды. Үш минуттан соң Рамазан Каримов кездесудегі жалғыз голды соқты.
«Қайраттың» ұпай жоғалтқанын «Ордабасы» сәтті пайдаланды. Шымкенттік клуб Бьорн Йонсеннің хет-тригі арқасында «Атырауды» 3:0 есебімен жеңді. Осылайша көш басындағы «Ордабасының» еншісінде 61 ұпай бар, ал екінші орында тұрған «Қайрат» 57 ұпай жинаған.
«Астана» жеңістен кейін 48 ұпаймен үшінші орынға жайғасты. Одан кейін 45 ұпайы бар «Оқжетпес» келеді. Көкшетаулықтар бұл турда «Жеңісті» 3:1 есебімен ұтты. Ал алғашқы бестікті 42 ұпай жинаған «Ақтөбе» түйіндеп тұр. Ақтөбеліктер өз алаңында «Ұлытаумен» 2:2 есебімен тең түсіп, қарсыластарына жақындай түсу мүмкіндігін пайдалана алмады.
Турнир кестесіндегі жағдай
Чемпионаттың аяқталуына үш тур қалғанда «Ордабасы» 61 ұпаймен көш бастап тұр. «Қайрат» шымкенттік клубтан төрт ұпайға қалып келеді. Екі команда да 26 матчтан өткізген.
Үшінші орында 25 кездесуден кейін 48 ұпай жинаған «Астана» тұр. Одан кейін «Оқжетпес» - 45, «Ақтөбе» - 42 және «Елімай» 38 ұпаймен орналасқан. «Астана» мен семейлік клубтың бір-бір ойыннан қоры бар.
Кестенің төменгі бөлігінде де тартыс қызу. «Қайсар» мен «Қызылжар» 24 ұпайдан жинап, тиісінше 13 және 14-орындарда тұр. 23 ұпайы бар «Атырау» 15-сатыға түсті, алайда команда әзірге 25 матч қана өткізген. Соңғы орында 26 кездесуден кейін 22 ұпай жинаған «Жетісу» келеді.
Енді Қазақстан Премьер-лигасында үзіліс болады. Чемпионаттың келесі матчтары қазан айында өтеді.
