Мирра Андреева спорттық азаматтығын ауыстыруы мүмкін: бұл жайлы не белгілі?
Мирра Андрееваның Ресей теннисіндегі болашағы назарға ілікті. Ресей теннис федерациясының президенті Шамиль Тарпищев 19 жастағы спортшыға спорттық азаматтығын ауыстыру туралы ұсыныс жасалған теннисшілердің қатарында екенін мәлімдеді, деп хабарлайды Sports24.kz.
Бұл тақырып Анна Блинкованың шешімінен кейін қайта көтерілді. 17 қыркүйекте әлемнің 94-ракеткасы енді Франция атынан өнер көрсететіні белгілі болды. Тарпищевтің айтуынша, Блинкованың шешімі федерация үшін күтпеген жағдай болмаған. Мұндай ұсыныстар басқа ресейлік теннисшілерге де түсіп жатыр.
«Блинкованың ауысуы біз үшін күтпеген жағдай болған жоқ. Мұндай ұсыныстарды көптеген ойыншыларымыз алып жүр, олардың арасында Андреева да бар. Қазір федерацияда бұрынғыдай келісімшарттық жүйе мен спортшыларды ұстап қалуға мүмкіндік беретін жағдай жоқ», - деді Тарпищев.
Федерация басшысы мұндай шешімдерге әсер ететін себептердің бірі ретінде теннисшілердің шетелдік жарыстарда кездесетін қиындықтарын атады. Оның ішінде виза мәселесі, әуе сапарлары және халықаралық турнирлерге қатысу шығындарының өсуі бар. Тарпищев соңғы шешімді әр спортшының өзі қабылдайтынын атап өтті.
Алайда Андрееваның өзі спорттық азаматтығын ауыстыру жоспары туралы әзірге ашық мәлімдеме жасаған жоқ. Қазіргі уақытта әңгіме тек Тарпищевтің теннисшіге осындай ұсыныстар жасалып жатқаны туралы сөзінен шығып отыр.
19 жастағы Андреева WTA рейтингінде бесінші орында және Ресейдің бірінші ракеткасы саналады. Биыл ол мансабындағы алғашқы «Үлкен дулыға» жүлдесін жеңіп, «Ролан Гаррос» чемпионы атанды. Жалпы Андрееваның еншісінде WTA турнирлеріндегі алты титул бар.
Андреева соңғы рет US Open-2026 турнирінде өнер көрсетті. Ресейлік теннисші ширек финалға дейін жетіп, америкалық Кори Гауффпен кездесті. Мирра алғашқы сетте сенімді жеңіске жетіп, екінші партияда екі матчболға ие болды. Алайда кездесуді жеңіспен аяқтай алмады. Гауфф ойынды өз пайдасына бұрып, 2:6, 7:6 (9:7), 6:2 есебімен жеңіске жетті.
