«Менде бір оғаш түйсік бар». Хамза Шираз Әлімханұлымен жекпе-жек өтпей қалуы мүмкін екенін жоққа шығармады
WBO нұсқасы бойынша суперорта салмақтағы әлем чемпионы атағы үшін британдық Хамза Шираз бен қазақстандық Жәнібек Әлімханұлы арасындағы жекпе-жекті өткізу құқығына арналған промоутерлік сауда-саттық қарсаңында белбеу иегері бұл айқастың мүлде өтпей қалуы мүмкін екенін жоққа шығармады, деп хабарлайды Sports24.kz.
«Біз күресеміз, бұл жекпе-жекті қабылдаймыз. Алға жылжиық. Мен DAZN-нан, Queensberry-ден (Шираздың промоутерлері — ред.) де, Top Rank-тен (Әлімханұлының промоутерлері — ред.) де ұсыныс алған жоқпын. Енді жекпе-жектің тағдыры аукционда шешіледі. Бәлкім, жақсы ұсыныс түсер, мен соның болғанын тілеймін. Сонда бәрі оңай — жекпе-жек өтеді. Бірақ менде оның болмай қалуы мүмкін деген бір оғаш түйсік бар. Не болатынын көре жатармыз», — деді Шираз Mr. Verzace подкастының эфирінде.
Еске салайық, Шираз бен Әлімханұлы арасындағы жекпе-жекті өткізу құқығына арналған сауда-саттықта Queensberry компаниясы жеңіске жетіп, ол үшін 1,2 миллион долларға жуық қаржы ұсынды. Алдын ала мәлімет бойынша, жекпе-жек 28 қарашада немесе 5 желтоқсанда Лондон, Бирмингем не Нью-Йорк қалаларының бірінде өтуі тиіс.
