2026 жылы он голдық әрекетке үлес қосқан ойыншы «Қайратқа» қарсы матчта «Ригаға» көмектесе алмайды
УЕФА-ның Тәртіптік комитеті Конференциялар лигасының іріктеу кезеңіндегі плей-офф раундының «Клаксвикке» қарсы қарымта матчында алаңнан қуылғаны үшін «Рига» қорғаушысы Андрес Саласарды үш матчқа дисквалификациялады, деп хабарлайды Sports24.kz.
Колумбиялық футболшының алаңдағы әдепсіз әрекеті қызыл қағазға себеп болды: ол 75-минутта фарерлік команданың қорғаушысы Йоханнес Даниэльсенді ұрып, артынша ойыншылар арасында жаппай қақтығыс туындады. Нәтижесінде Саласар матчты мерзімінен бұрын аяқтады.
УЕФА-ның Тәртіптік комитеті іс материалдарын бір айға жуық зерттеп, 23 қыркүйекте үкім шығарды: колумбиялық футболшы УЕФА аясындағы үш матчқа шеттетілді. Демек, дәл «Қайратқа» қарсы матч «Риганың» сол қапталдағы қорғаушысы өткізіп алатын үш кездесудің біріншісі болады.
Колумбиялық футболшы Латвия астанасына әлі де бейімделіп жүр: ол 2026 жылдың ақпанында колумбиялық «Атлетико Насьональдан» ауысқан. «Рига» сапындағы 29 матчта Саласар екі гол соғып, сегіз нәтижелі пас берді. Мұның өзі оның қорғаушы екенін ескерсек, өте жоғары көрсеткіш.
