«Мен алтынға құмармын, ол — біздікі»: Ольга Рыпакова Токсанбаеваның Азия ойындарындағы алтынынан айырылуы туралы
Қазақстан жеңіл атлетика федерациясы атқарушы комитетінің төрағасы Ольга Рыпакова Ясмина Токсанбаеваның Айчи мен Нагояда өткен 2026 жылғы Азия ойындарындағы алтын медальдан айырылуына қатысты пікір білдірді, деп хабарлайды Sports24.kz.
27 қыркүйекте Ясмина Токсанбаева 42,195 шақырымдық марафондық спорттық жүрісте 3 сағат 22 минут 20 секунд нәтижесімен бірінші болып мәреге жетті.
Алайда жарыстан кейін спортшының нәтижесі пайдаланған аяқ киіміне байланысты жойылды. Оның аяқ киім үлгісі World Athletics ұйымы мақұлдаған тізімде болмаған. Нәтижесінде алтын медаль Қытай өкілі Даньцэн Цюйцзунға берілді.
Рыпакова жоғары жетістіктер спортында спортшылар мен команда өкілдеріне үлкен жауапкершілік жүктейтін көптеген ережелер, регламенттер және техникалық талаптар бар екенін атап өтті.
Оның айтуынша, Токсанбаеваның жаттықтырушысы мен команда өкілінің жағдайға реакциясы дер кезінде болып, белгіленген талаптарға сәйкес келген.
«Мен ең жоғары деңгейдегі жарыстарда алтын медальдің қаншалықты маңызды екенін жақсы білемін. Мұндай додаларда еліміздің беделі барлық спорт түрлері бойынша Қазақстан құрамасының жалпыкомандалық есептегі нәтижесіне тікелей байланысты. Ал ең алдымен алтын медальдар саны маңызды. Әр медальдің шешуші мәні болуы мүмкін», — деп жазды Рыпакова.
Ол сондай-ақ жағдайды шешу үшін түрлі мүмкіндіктер пайдаланылғанын айтты. Атап айтқанда, Қазақстан өкілдері аяқ киім өндірушісімен, сондай-ақ Азия жеңіл атлетика қауымдастығы мен World Athletics басшылығымен байланысқа шыққан.
«Спортшы ретінде әртүрлі деңгейдегі жарыстарда түрлі дәрежедегі медальдарды жеңіп алуда мол тәжірибем бар. Енді оған медальдарды қайтарып алу тәжірибесі қосылып отыр. Мен "алтынға" құмармын, ол — біздікі», — деді Рыпакова.
Сөз соңында чемпион спорттағы өзіне берілген басты сабақтардың бірі кінәліні іздеу емес, жауапкершілікті өз мойнына алып, мәселенің шешімін іздеу екенін атап өтті.
«Кінәліні іздеу — әлсіздердің ісі», — деп түйіндеді Рыпакова.
Айта кетейік, Ольга Рыпакова — Лондон-2012 Олимпиадасының үш қарғып секіруден чемпионы, Олимпиада ойындарының үш дүркін жүлдегері және Қазақстан жеңіл атлетика федерациясының құрметті президенті.
Бұған дейін Қазақстан жеңіл атлетика федерациясы бұл шешімге наразылық пен шағым түсіріп, сондай-ақ Токсанбаеваға істің қаралу нәтижесіне қарамастан чемпионға тиесілі барлық жүлде ақшасы төленетінін мәлімдеген еді.
