Тимур Журавель Сәтпаевтың «Бернли» сапындағы ойынына баға берді
Танымал ресейлік комментатор Тимур Журавель Чемпионшиптегі матчта ағылшынның «Бернли» клубы сапында өнер көрсеткен 18 жастағы қазақстандық шабуылшы Дастан Сәтпаевтың ойыны туралы пікір білдірді, деп хабарлайды Sports24.kz.
Сәтпаев команда құрамында тағы да негізгі құрамнан орын алып, кездесудің соңына қарай жарақатына байланысты алаңнан ауыстырылды. Қазақстандық футболшы алаңнан кетіп бара жатқанда жанкүйерлердің зор қошеметіне ие болды.
Журавель жас футболшының алаңдағы бар күшін салғанын және Англия чемпионатындағы күшке негізделген күреске дайын екенін атап өтті.
«Дастан Сәтпаев тағы да негізгі құрамда шыққан «Бернлидің» матчын көрдім. Ағылшын комментаторлары оны "Сатпэев" деп атайды. Матчтың соңына қарай жарақатына байланысты ауыстырылды және алаңнан зор қошеметпен кетті. Өйткені барлығы жас жігіттің өз мүмкіндігіне қаншалықты тырысып жатқанын көрді: допты алға сүйрейді, күреске ұмтылады, қақпаға соққы жасайды. Дастан небәрі 18 жаста, бірақ қазірдің өзінде осындай мығым, Чемпионшиптегі күшке толы күреске төтеп беріп жүр. Азамат!» — деп жазды Журавель әлеуметтік желідегі парақшасында.
Ол қазіргі «Бернлиді» Венсан Компани басқарған кездегі командамен де салыстырып, Чемпионшиптегі бәсекелестіктің жоғары деңгейін атап өтті.
«Қазіргі «Бернли» Компани кезіндегіден әлдеқайда қарапайым команда екені анық. Қызығы, қазір оларды да бельгиялық маман жаттықтырады. Бірақ оның допқа иелік етуге Компани сияқты емес, мүлде басқаша қарайтыны анық. Соған қарамастан, екі кеш қатарынан Ресей кубогынан Чемпионшипке ауысып көріп отырып, Слуцкийдің бағаларын есіме түсірдім. Бұл шынымен де өте мықты әрі бәсекелі турнир», — деп қосты комментатор.
Бұған дейін «Бернли» сапындағы 18 жастағы қазақстандық шабуылшы Дастан Сәтпаев Чемпионшипте «Мидлсброға» қарсы матчтың үздік ойыншысы деп ресми түрде танылған болатын. «Терф Мур» стадионында өткен кездесу 1:1 есебімен аяқталды.
