«Сендер бізге сенбедіңдер – ал біз чемпионбыз!» – ПСЖ президенті «Интерді» тарихи жеңгеннен кейін
«Пари Сен-Жермен» клубының президенті Нассер Аль-Хелаифи Чемпиондар лигасының финалындағы тарихи жеңістен кейін әсерлі мәлімдеме жасады. Париждік команда шешуші ойында Миланның «Интерін» 5:0 есебімен ойсырата жеңді.
«Сіздер бізді үнемі сынап, күмәнмен қарадыңыздар. Бүгін біз барлығына өзіміздің жеңіске жете алатынымызды дәлелдедік. Біз – Чемпиондар лигасының жеңімпазымыз! Бұл нәтиже – мақтанышпен айтуға тұрарлық. Біз тек Париж үшін ғана емес, бүкіл Франция үшін ойнадық. Бізде жанкүйерлердің алып армиясы бар, олардың қолдауы бізге үлкен мақтаныш сыйлайды. Бас бапкерімізге, футболшыларымызға, Луиш Кампушқа және осы тарихи жетістікке үлес қосқан барлық жандарға алғысымды білдіремін», – деді Аль-Хелаифи RMC Sport арнасына берген сұхбатында.
ПСЖ тарихында алғаш рет Чемпиондар лигасының кубогына ие болып, Еуропаның ең беделді клубтық турнирінің жеңімпаздары қатарына енді. Осылайша, париждік клуб 1992/93 маусымында жеңіске жеткен «Марсельден» кейін бұл жетістікке жеткен екінші француз командасы атанды. Ал «Интер» үшін бұл Чемпиондар лигасы финалындағы төртінші жеңілісі болды.
