«Ол Португалияға зиянын тигізіп жатыр». МЮ аңызы Роналдуды қатаң сынға алды
«Манчестер Юнайтедтің» бұрынғы жартылай қорғаушысы Пол Скоулз Криштиану Роналдудың Португалия құрамасындағы рөлі туралы пікір білдірді, деп хабарлайды Sports24.kz.
Ағылшын футболының аңызы 41 жастағы шабуылшының ұлттық құрамадағы негізгі құрам ойыншысы болуы дұрыс емес деп есептейді.
«Бапкер үшін бұл өте күрделі жағдай. Мен Роберто Мартинестен Роналду команда үшін мәселе емес пе деп сұрадым. 41 жаста орталық шабуылшы ретінде ойнау өте қиын. Иә, ол әлі де гол соға алады, бірақ қазіргі футболда қозғалыс, жылдамдық және алаңдағы үлкен жұмыс қажет. Меніңше, қазір Роналду матчтың соңғы 15 минутында алаңға шығатын ойыншы рөлінде тиімдірек болар еді», - деді Скоулз.
Сондай-ақ бұрынғы футболшы португалиялық жұлдыздың басты бәсекелестерінің жетістіктері оған психологиялық тұрғыда әсер етуі мүмкін екенін айтты.
«Криштиануға Лионель Мессидің хет-трик жасап, Килиан Мбаппенің дубль авторы атанғанын көру оңай емес шығар. Мұндай жағдайлар оның деңгейіндегі ойыншыларға әсер етпей қоймайды», - деп қосты ол.
Скоулз бен Роналду 2003-2009 жылдар аралығында «Манчестер Юнайтедте» бірге өнер көрсетті. Осы кезеңде олар Англия Премьер-лигасының үш дүркін чемпионы атанып, 2008 жылы Чемпиондар лигасын жеңіп алды.
Айта кетейік, Роналдуға қатысты сын Португалия құрамасының әлем чемпионатындағы алғашқы матчынан кейін күшейе түсті. Португалиялықтар Конго Демократиялық Республикасымен 1:1 есебімен тең ойнап, ал команданың капитанының ойыны жанкүйерлер мен сарапшылар арасында қызу талқыға түсті.
Бұған дейін Роналдудың жанкүйерлері Жоау Невеш пен Бруну Фернандешті сынға алған болатын. Алайда футболшылардың жақындары әлеуметтік желілерде оларды қорғап, жауап қайтарды.
