Бірінші турдан кейін ӘЧ-2026 жеңімпазына үміткер құрамалардың мүмкіндігі белгілі болды
Opta статистикалық платформасының суперкомпьютері топтық кезеңнің алғашқы турында өткен матчтардан кейін 2026 жылғы әлем чемпионатының басты фавориттерін атады, деп хабарлайды Sports24.kz.
Жаңартылған болжам бойынша турнирдің басты фавориті - Франция құрамасы. Дидье Дешам шәкірттерінің әлем чемпионы атану мүмкіндігі 15,7 пайызға бағаланған.
Екінші орынға Англия мен Аргентина құрамалары жайғасты. Екі команданың да титул жеңіп алу ықтималдығы 12,3 пайызды құрайды.
Әлем чемпионаты басталар алдында басты фаворит саналған Испания құрамасы бұл рейтингте төртінші орынға түсіп қалды. Испандар алғашқы турда Кабо-Вердемен 0:0 есебімен тең ойнап, жеңіске жете алмады. Қазір олардың чемпион атану мүмкіндігі 12,1 пайыз деп бағалануда.
Үздік ондыққа сондай-ақ Германия (6,4%), Португалия (5,9%), Бразилия (5,4%), Норвегия (4,7%), Нидерланд (3,1%) және Колумбия (2,8%) құрамалары енді.
Франция құрамасы әлем чемпионатын сенімді жеңіспен бастады. Алғашқы турда француздар Сенегалды 3:1 есебімен жеңді. Матчтың басты қаһарманы Килиан Мбаппе болды - ол дубль авторы атанса, тағы бір голды Брэдли Баркола соқты.
