Хиба Абуктың драмасы: ПСЖ жұлдызы ажырасу кезінде әйелін қалай алдап кеткенін айтты
ПСЖ-ның марокколық қорғаушысы Ашраф Хакими Хиба Абукпен 2020 жылдан 2023 жылға дейінгі дау-дамайлы ажырасуы туралы алғаш рет ашық айтты, деп хабарлайды Sports24.kz.
Motivaciones Fútbol-дың, Хакимидің өзіне сілтеме жасай отырып таратқан ақпараты бойынша, футболшы әйелінің ниеті таза емес екенін үйленген соң екі ай өткенде-ақ түсінген.
Некедегі бетбұрыс сәт
Бетбұрыс сәт тойдан бір жыл өткен соң таңертеңгі жанжалдан кейін орын алған. Сол кезде Хиба Ашрафқа кез келген уақытта ажырасуға арыз беріп, оның миллиондаған байлығының тең жартысын талап ететінін айтып қорқытқан. Ақшасына қызыққан әйелмен бірге өмір сүріп жатқанын сезген Хакими өз активтерін қорғау үшін алдын ала әрекет етуге шешім қабылдаған.
Футболшы бұл мәселеде өміріндегі ең сенімді адамы — анасына жасырын түрде жүгінген. Жағдайды түсіндірген соң анасы ұлына толық қолдау көрсетіп, олардың жетістікке жету жолында қандай қиындықтарды бастан өткергенін еске салып, ешбір әйелдің оның өмірін бұзуға жол бермейтінін айтқан.
Сол күні Ашраф барлық мүлкін, жылжымайтын мүліктерін және банк шоттарын арнайы траст қоры арқылы анасының атына аударып, өзін заңды түрде ешнәрсесіз қалдырды. Қорғаушы бұл әрекетіне күлкімен қарап, тіпті күнделікті киімдері мен футбол формасы да енді ресми түрде анасының меншігіне өткенін әзілдеп жеткізген.
Әйелі ештеңесіз қалды
Хиба Абук Ашрафты қаржылай күйретуді жоспарлап, ажырасуға ресми арыз бергенде, Хакими тек күліп қана қойды — оның жоспары сәтті жүзеге асты. Сотта бұрынғы әйелін күтпеген тосын жаңалық күтіп тұрды: Ашрафтың атына ештеңе тіркелмеген болып шықты, ал осы жылдар бойы отбасын асырап келген — анасы. Футболшының айтуынша, Хиба сот залында жылаған — некенің бұзылғанына емес, ешнәрсесіз қалғанына.
Хиба Абук кім?
39 жастағы Хиба Абук — танымал актриса. Тунистік-ливандық тегі бар испан актрисасы кең танымалдылыққа «Принц» атты әйгілі испан сериалында Фатима рөлін сомдау арқылы ие болды.
Абук сондай-ақ «Жынды өмір» және «Чирс» секілді жобалардағы рөлдерімен де белгілі. 2014 жылы Cosmopolitan Beauty Awards сыйлығының «Әйел сұлулығының иконасы» номинациясына ие болған.
Қызықты факт: Хиба Ашрафтан тура 12 жас үлкен. Дегенмен, жастың айырмашылығы оларды ешқашан алаңдатпаған. Актриса бірнеше рет Ашрафты «өмірімнің ері, тағдырым» деп ашық айтқан. Жұлдызды жұптың некесінен екі ұлы дүниеге келді (Амин және Наим).
