ФИФА әлем чемпионаттарының құқықтарын сатуы мүмкін: Инфантиноның жоспары үлкен сынға ұшырады
Әлем чемпионаттарының коммерциялық құқықтарына қатысты жаңа бастама футбол қауымдастығында қызу пікірталас тудырды, деп хабарлайды Sports24.kz.
The Times басылымының мәліметінше, ФИФА президенті Джанни Инфантино ерлер, әйелдер және клубтар арасындағы әлем чемпионаттарының коммерциялық құқықтарын басқаратын жеке компания құру мүмкіндігін қарастырып жатыр. Кейін осы құрылымның акцияларының бір бөлігін жеке инвесторларға ұсыну жоспарда бар.
Британдық басылымның жазуынша, бұл жоба АҚШ президенті Дональд Трамптың айналасындағы адамдармен талқыланған. Инвестициялық топты Трамптың күйеу баласы Джаред Кушнердің інісі Джошуа Кушнер негізін қалаған Thrive Capital компаниясы басқаруы мүмкін.
The Times дерегіне сәйкес, ФИФА құрамындағы 211 ұлттық қауымдастықтың әрқайсысы шамамен 20 миллион доллар тұратын үлеске ие болады. Федерациялар бұл үлесті өзінде қалдыруына немесе бірден сатып, қосымша қаржы алуына мүмкіндік беріледі.
Сондай-ақ басылым Инфантино президенттік өкілеттігі аяқталғаннан кейін жаңа компанияда басшылық қызмет атқаруы мүмкін екенін жазды. Ал ФИФА бұл жоба бойынша жұмыс жүргізіліп жатқанын ресми түрде растады.
Бұл бастамаға УЕФА бірден қарсы шықты.
«Бұл – футбол ұйымдары ешқашан аттамауы тиіс шекара. Футболдың жаны мен оны басқару жүйесі саудаға салынатын дүние емес. ФИФА бүкіл футбол қауымдастығына тиесілі дүниені сатуға құқылы емес», – деп мәлімдеді УЕФА.
Ұлыбритания премьер-министрі Энди Бернем де бұл идеяны қолдамады.
«Футбол инвесторларға емес, әр апта сайын стадионға келіп, өз командасын қолдайтын жанкүйерлерге тиесілі. Әлем чемпионаты – тауар емес. Оның бір бөлігін сатудың өзі футболдың басты құндылықтарына қауіп төндіреді», – деді Бернем.
Айта кетейік, 2026 жылғы әлем чемпионатының жеңімпазы – Испания құрамасы. Финалда испандар Аргентинаны 1:0 есебімен жеңіп, жеңіс голын қосымша уақытта Ферран Торрес соқты.
