ҚФФ Самородовтың Ұлттар лигасындағы матчтарға қатысуына қатысты шешімін жариялады
Қазақстан құрамасының шабуылшысы Максим Самородов команданың Ұлттар лигасының алдағы маусымындағы алғашқы екі кездесуіне қатыса алмайды, деп хабарлайды Sports24.kz.
ҚФФ мәлімдемесіне сәйкес, грозныйлық «Ахмат» клубының форварды жарақатына байланысты командамен бірге Фарер аралдары мен Словакияға қарсы матчтарға барған жоқ. Әзірге ол Қазақстан құрамасының медициналық штабының бақылауында. Алдағы уақытта мамандар оның Фарер аралдары мен Молдоваға қарсы өз алаңымыздағы матчтарға қатыса алатынын анықтайды.
«Қазақстан футбол құрамасының ойыншысы Максим Самородов жарақатына байланысты УЕФА Ұлттар лигасы аясында Фарер аралдары мен Словакия құрамаларына қарсы сырт алаңдағы матчтарға қатыспайды. Ойыншының Молдова мен Фарер аралдары құрамаларына қарсы өз алаңымыздағы матчтарға қатысуы әзірге белгісіз. Ол ұлттық құраманың медициналық штабының бақылауында. Максимге тезірек сауығып, ұлттық құрама сапына оралуын тілейміз!» — делінген ҚФФ мәлімдемесінде.
Еске салайық, бұған дейін Sportskeeda басылымы алдағы Фарер аралдары — Қазақстан матчының болжамымен бөліскен болатын.
