Чемпион ауыса ма? «Ордабасы» Йонсеннің хет-тригі арқылы «Атырауды» ойсырата жеңді
«Ордабасы» Қазақстан Премьер-лигасының 27-туры матчында «Атырауды» ойсырата жеңді, деп хабарлайды Sports24.kz.
«Қайраттың» «Астанамен» матчтағы (0:1) ауыр жеңілісінен кейін Андрей Мартин шәкірттерінің басты бәсекелесінен ұзап кетуге тамаша мүмкіндігі болды. Олар бұл мүмкіндікті толық пайдаланды.
Шымкенттік ұжым сырт алаңда қарсыласының қақпасына жауапсыз үш гол соқты. Хет-трикті қонақтар командасының норвегиялық легионері Бьорн Йонсен жасады. Йонсен алғашқы голын 20-минутта соқты, ал норвегиялық шабуылшы екінші таймда алаң иелерінің қақпашысын тағы екі рет қапаландырып, есепті толықтырды.
Осылайша, Шымкент ұжымы ойындар саны бірдей кезде «Қайраттан» төрт ұпайға ұзап кетті. ҚПЛ маусымының аяқталуына төрт тур қалды.
ҚПЛ, 27-тур
«Атырау» – «Ордабасы» 0:3
Голдар: Йонсен, 20, 54, 90+2
