«Челси» Сәтпаевтың «Бернли» сапындағы негізгі құрамдағы дебютіне баға берді
Лондондық «Челсидің» JnR жанкүйерлер аккаунты Дастан Сәтпаевтың «Бернли» сапындағы негізгі құрамдағы алғашқы матчын бағалады, деп хабарлайды Sports24.kz тілшісі.
Қазақстан құрамасының шабуылшысы Англия Лигасы кубогының «Брэдфорд Ситиге» қарсы матчында «Бернли» сапында алғашқы минуттардан бастап алаңға шығып, 78 минут ойнады. Алайда нәтижелі әрекетімен көзге түсе алмады.
«Сәтпаев өзіне тән емес позицияда ойнап жүр, бірақ соған қарамастан оның шеберлігі мен физикалық дайындығын байқауға болады. Бұл ол үшін тамаша тәжірибе болмақ», — деп жазды JnR паблигі.
Лига кубогының екінші кезеңіндегі кездесу голсыз аяқталды, ал пенальти сериясында Лига 1 өкілі «Брэдфорд Сити» 4:2 есебімен басым түсті.
Қазақстан құрамасының шабуылшысы үшін «Брэдфорд Ситиге» қарсы матч «бордолылар» сапындағы екінші ойыны және «Челсиден» ауысқаннан кейінгі негізгі құрамдағы алғашқы кездесуі болды. Қазақстандық футболшы ағылшын командасына маусым соңына дейін жалға берілді.
Енді «Бернли» Чемпионшиптегі ойындарына назар аударады. Сәтпаевтың командасы келесі матчын 29 тамызда сырт алаңда «Норвичке» қарсы өткізеді. «Карроу Роуд» стадионындағы кездесу Қазақстан уақытымен сағат 19:00-де басталады.
