“Бұл – бұрын болмаған, жаңа жағдай”. Симеоне пенальти сериясына VAR жүйесінің араласуына таң қалды
“Атлетиконың” бас бапкері Диего Симеоне Хулиан Альварестің пенальти сериясындағы соққысының есепке алынбауына күмән келтірді. Аргентиналық маманның айтуынша, бұл сәт өте даулы, ал ВАР-дың араласуы үлкен сұрақтар тудырады.
Ойыннан кейін Симеоне “Реалға” қарсы матчтағы басты эпизод туралы өз пікірін білдірді:
“Мен видеоны қайта қарап шықтым. Төрешілер Хулианның тірек аяғы допқа тигенін айтады, бірақ доп мүлде қозғалмады! Бұл гол болды ма, жоқ па – өте даулы жағдай. Бірақ мен өз ойыншыларыммен мақтанамын, олар мінсіз ойнады. Шын айтсам, мен бақыттымын”, – деді Симеоне.
Сонымен қатар, Симеоне ВАР жүйесінің пенальти сериясындағы қолданылуына таңғалғанын жасырмады:
“Мен ешқашан ВАР-дың пенальти сериясындағы соққыларды қайта қарағанын көрген емеспін. Бұл – бұрын болмаған, жаңа жағдай”, – деп атап өтті аргентиналық бапкер.
Сондай-ақ, ол журналистерге сауал қойып, осы сәтте Альварестің екі рет тигенін анық көрсететін бейнеқайталауды көргендерден қол көтеруді сұрады.
Төреші шешімі төңірегіндегі дау-дамайға қарамастан, “Корольдік клуб” Чемпиондар лигасында жаңа рекорд орнатты. “Реал” турнир тарихындағы ең көп пенальти сериясын жеңген команда атанып, ЧЛ-дағы абсолютті көшбасшыға айналды.
