«Бірақ ең бастысы – тәжірибе»: Сарапшы «Қайраттың» Чемпиондар лигасындағы ойыны туралы пікір білдірді
Қазақстандық футбол маманы Ғани Қайназаров Sports24.KZ тілшісіне берген сұхбатында алматылық «Қайраттың» «Спортингке» қарсы ойынындағы жеңілісі туралы пікірін ортаға салды.
«Баршамызды негізгі кезеңнің басталуымен құттықтаймын және «Қайратқа» Чемпиондар лигасын сыйлағаны үшін алғыс айтамын. Бұл – бүкіл Қазақстан үшін үлкен оқиға, команда елімізді абыроймен танытып жатыр. Бірінші матч өте қиын өтті, қарсыласымыз – Лиссабонның «Спортингі», өте жоғары деңгейдегі ұжым. Бастапқы кезеңде жігіттеріміз жаман ойнаған жоқ: бір нәрсе шықты, бір нәрсе шықпады, бірақ 1:0 есебінде бірнеше жақсы мүмкіндікті пайдалана алмағанымыз өкінішті. Мүмкін, сол сәттер голға айналса, ойынның бағыты өзгерер ме еді.
Ең маңыздысы қазір – тәжірибе. Қазақстан футболының қаншама түлегі, «Қайрат» жүйесінде өскен ойыншылар алаңға шықты. Бұл біз үшін мақтаныш. Осындай деңгейдегі қарсыластармен кездесу – олардың мансабында үлкен қадам, бұл – мектеп, даму, шеберлікті шыңдаудың маңызды кезеңі.
Тактикалық жайттарға тоқталмай-ақ қояйын, тек айтарым: бұл – қазақстандық футбол үшін нағыз мереке. Иә, соңғы минуттар ауыр болды: 5 минутта үш гол жіберіп алдық, мүмкін, зейін жетіспеген шығар. Бірақ бұл – командалық ойын, қателіктер әрдайым кешенді түрде қаралуы тиіс. Осындай сырт алаңда және өз алаңымызда тәжірибе жинаған сайын, жігіттер әлдеқайда сенімді ойнап, көп компонентте өсе түсетініне сенемін.
Чемпиондар лигасында қарсыластар өте мықты, қарқын басқаша, шеберлік те өзгеше. Әр ойын аса жоғары шиеленіспен өтеді: турнирдің әнұраны, толы стадион, ерекше атмосфера – мұның бәріне үйрену керек. Ойыншыларымыз жарады: гол соқты, тағы 2–3 керемет мүмкіндік болды. Енді басты мақсат – тәжірибе жинап, қадам сайын алға жылжи беру.
Бәріміз сенеміз: команда ұпай жинап, жанкүйерлерді қуантады, ал «Қайрат» бізге жоғарғы деңгейдегі эмоция сыйлай береді», – деп атап өтті сарапшы.
Айта кетейік, матч 4:1 есебімен Лиссабон клубының пайдасына аяқталды. «Қайраттың» жалғыз голын алаңға ауысып шыққан бразилиялық Эдмилсон соқты.
