«Атырау» мен «Жетісу» жеңімпазды анықтай алмады
Қазақстан Премьер-Лигасының 20-турының ойын күніндегі алғашқы кездесу тең нәтижемен аяқталды. «Атырау» мен «Жетісу» 1:1 есебімен ұпай бөлісті, деп хабарлайды Sports24.kz.
Алаң иелері алғашқы таймның ортасында есеп ашты. Айып алаңындағы ереже бұзушылықтан кейін белгіленген пенальтиді Қуаныш Қалмұратов сәтті орындады. Үзілістен кейін талдықорғандықтар таразы басын теңестірді. Алаңға қосалқы құрамнан шыққан Шохан Абзалов дәл соққысымен матчтың қорытынды есебін белгіледі.
Осылайша, екі команда да төрт матчқа созылған жеңіліс сериясын тоқтатқанымен, турнирлік кестедегі жағдайын айтарлықтай жақсарта алмады. 20 турдан кейін «Атырау» мен «Жетісудың» еншісінде 19 ұпайдан бар.
ҚПЛ. 20-тур
«Атырау» – «Жетісу» – 1:1 (1:0)
Голдар: Қалмұратов, 24 (пенальтиден) – 1:0, Абзалов, 50 – 1:1.
Сонымен қатар, ойын күнінің өзге кездесулерінде «Қызылжар» өз алаңында «Ақтөбені» 3:1 есебімен жеңсе, павлодарлық «Ертіс» қосымша уақыттың 90+14-минутында пенальтиден жеңіс голын соғып, «Каспийді» 3:2 есебімен тізе бүктірді. Бұл павлодарлық клубтың Қазақстан Премьер-лигасындағы қатарынан екінші жеңісі болды.
