АҚШ, Мексика және Канада: ӘЧ-2026 турнирін қабылдайтын елдер туралы не білу керек
2026 жылғы әлем чемпионатының басталуына санаулы күндер қалды. Ал алдағы мундиаль алғашқы матчқа дейін-ақ футбол тарихындағы ең ерекше әрі ең ауқымды турнир ретінде талқылана бастады.
2026 жылғы әлем чемпионаты алғаш рет бірден үш елде - АҚШ, Мексика және Канадада өтеді. Бұған қоса, тарихта тұңғыш рет әлем біріншілігіне 48 құрама қатысады.
Футбол, алып стадиондар, ондаған қала, миллиондаған жанкүйер мен рекордтық матч саны - әлем XXI ғасырдағы ең ірі мундиальға дайындалып жатыр.
АҚШ чемпионаттың басты орталығына айналады
Турнир матчтарының басым бөлігі дәл АҚШ аумағында өтеді.
Америка Құрама Штаттары әлем чемпионатын екінші рет қабылдамақ. Бұған дейін АҚШ мундиальды 1994 жылы өткізген еді. Сол турнирде Бразилия құрамасы чемпион атанған болатын.
ӘЧ-2026 матчтары АҚШ-тың бірден 11 қаласында ұйымдастырылады.
Батыс аймақта Лос-Анджелес, Сан-Франциско және Сиэтл матчтарды қабылдайды.
Орталық бөлікте ойындар Даллас, Хьюстон және Канзас қалаларында өтеді.
Ал турнирдің басты атмосферасы АҚШ-тың шығыс жағалауында болмақ. Нью-Йорк, Майами, Атланта, Бостон және Филадельфия қалалары әлем чемпионатының негізгі орталықтарының біріне айналады.
Дәл осы АҚШ-та ең қымбат билеттер, ең үлкен фан-аймақтар және рекордтық көрермен саны күтілуде.
Мексика тағы да футбол тарихына енеді
Мексика әлем чемпионатын үшінші рет қабылдайтын алғашқы мемлекет болмақ.
Бұған дейін мексикалықтар 1970 және 1986 жылдардағы мундиальдарды өткізген. Бұл турнирлер Пеле мен Диего Марадонаның тарихи сәттерімен есте қалған еді.
Әч-2026 матчтары Мехико, Монтеррей және Гвадалахара қалаларында өтеді.
Ерекше назар аты аңызға айналған «Ацтека» стадионына аударылып отыр. Дәл осы аренада әлем чемпионатының ашылу матчы өтеді.
Кезінде дәл осы стадионда Марадона Англия қақпасына әйгілі «Құдайдың қолы» голын соққан болатын.
Канада алғаш рет әлем чемпионатын қабылдайды
Ал Канада үшін бұл мундиаль тарихтағы алғашқы әлем чемпионаты болмақ.
Турнир матчтары Торонто мен Ванкувер қалаларында өтеді.
Қала саны аз болғанымен, ұйымдастырушылар Канададағы атмосфера ерекше болады деп сендіріп отыр. Елде ауқымды фан-аймақтар мен арнайы фестивальдер ұйымдастырылмақ.
ӘЧ-2026 финалы қайда өтеді?
Әлем чемпионатының матчтары жалпы 16 стадионда өтеді.
Оның 11-і АҚШ-та, үшеуі Мексикада және екеуі Канадада орналасқан.
Турнирдің ашылу матчы 2026 жылдың 11 маусымында Мехикодағы әйгілі «Ацтека» стадионында өтеді.
Ал әлем чемпионатының финалы Нью-Йорктегі MetLife аренасында ұйымдастырылады. Турнир кезінде ФИФА ережесіне байланысты стадион «Нью-Йорк - Нью-Джерси» атауымен қолданылады.
Қазақстандық жанкүйерлер ӘЧ-2026 матчтарын тікелей эфирде Qazsport телеарнасынан көре алады.
