Байсуфинов Қазақстан құрамасынан Астановтың неге жоқ екенін түсіндірді
Қазақстан ұлттық құрамасының бас бапкері Талғат Байсуфинов Шымкенттің «Ордабасы» командасының жартылай қорғаушысы Эльхан Астановты маусымдағы Армения және Венгрияға қарсы жолдастық ойындарға шақырмау туралы шешіміне түсініктеме берді, деп хабарлайды Sports24.kz.
Маманның айтуынша, бапкерлер штабы футболшының мүмкіндіктерімен жақсы таныс, алайда қазіргі таңда ұлттық құрамада бәсекелестік өте жоғары, команда құрамын жаңарту үдерісі жалғасуда.
«Эльхан Астановтың шақырылмауына келсек, оның мүмкіндіктерін біз бұрыннан білеміз. Егер есіңізде болса, 2022 жылы біз жастар құрамасынан негізгі құрамға үш ойыншы қостық. Олар — Данияр Үсенов, Максим Самородов және Эльхан Астанов. Сол кезде Францияға қарсы матчта біз бірден Максим мен Эльханға мүмкіндік бердік», — деді Байсуфинов.
- Сондай-ақ оқыңыз: «Көңіл-күйіңізді бұзуға тырысамыз» – Армения құрамасының бапкері Қазақстанмен матч алдында
Бапкер сол уақыттан бері қазақстандық футболда жаңа буын өкілдері өсіп шыққанын, олардың да ұлттық құрамаға орыннан үміткер екенін атап өтті.
«Дегенмен уақыт өтуде, жаңа жастар өсіп келеді. Қазір құрамада бәсекелестік өте жоғары. Ұлттық құрамаға есік баршаға ашық, және менің ойымша, жігіттер мұны жақсы түсінеді, ешқандай мәселе жоқ», — деп түйіндеді бапкер.
Байсуфинов маусым айындағы жиынға шақырылмаған футболшылардың күздегі ресми матчтар алдындағы құрамға оралу мүмкіндігі әлі де бар екенін айтты.
«Егер олар өз клубтарында тұрақты әрі жақсы ойнайтын болса, күздегі ресми ойындарға дейін әлі уақыт бар. Кім дайын болады – күзде көреміз», — деді бас бапкер.
Айта кетейік, Қазақстан құрамасы 6 және 9 маусымда Армения және Венгриямен жолдастық матчтар өткізеді. Ақтық құрамға Эльхан Астанов енген жоқ.
