«Қайрат» өз алаңында «Андерлехттен» ойсырай жеңілді
«Қайрат» Алматыдағы өз алаңында өткен УЕФА Еуропа лигасының плей-офф кезеңінің алғашқы матчында бельгиялық «Андерлехттен» ойсырай жеңілді, деп хабарлайды Sports24.kz.
Бельгиялық қонақтар алғашқы таймда-ақ үш доп айырмасымен алға шығып, қарсыластық тағдырын 45 минутта-ақ шешіп тастады.
Ойынның 2-минутында Оксанен өз қақпасына гол соғып, автоголмен есеп ашылды. 24-минутта Амброс бельгиялықтардың басымдығын еселей түсті.
Алаң иелерінің мәселесі мұнымен бітпеді. 40-минутта Широбоков дөрекі фол үшін тікелей қызыл қағаз алып, командасын азшылықта қалдырды. Ал Сикан алғашқы тайм соңында есепті ірі етіп, алматылықтарды тіпті тұқыртты.
Екінші тайм, негізінен, формалдылыққа айналды. Осылайша, бельгиялықтар айқын басымдықпен 3:0 есебімен жеңіске жетті.
Жауаптық матч Бельгияда 27 тамыз күні, Қазақстан уақытымен 23:30-да өтеді. Бірінші ойындағы осындай нәтижеден кейін, «Қайраттың» күзде Конференциялар лигасында өнер көрсету ықтималдығы өте жоғары.
УЕФА Еуропа лигасы
Плей-офф кезеңі, 1-матч
«Қайрат» – «Андерлехт» 0:3
Голдар: Оксанен, 2, автогол; Амброс, 24; Сикан, 45
Қызыл қағаз: Широбоков, 40
