«Жарқын ойын, көп гол күтемін» — сарапшы Чемпиондар лигасындағы ПСЖ — «Барселона» матчының нәтижесін болжады
Қазақстандық танымал спорт журналисті әрі комментатор Дидар Есемов Чемпиондар лигасы жалпы кезеңінің үшінші турында Париждегі «Парк-де-Пренс» стадионында өтетін ПСЖ мен «Барселона» арасындағы алдағы матчтың ықтимал нәтижесі туралы пікір білдірді, деп хабарлайды Sports24.kz.
«Пари Сен-Жермен» мен «Барселона» матчқа жақсы формада келеді. Алайда париждіктердің өз алаңындағы ойын факторы есебінен аздаған басымдығы бар. Бұған қоса, Луис Энрике шәкірттері алдыңғы турда сырт алаңда «Манчестер Ситиді» жеңді.
«Пари Сен-Жермен — «Барселона» матчы тек Чемпиондар лигасының осы турындағы ғана емес, бүкіл жалпы кезеңдегі орталық кездесулердің бірі болуы мүмкін. Ойын деңгейі мен нәтижелер тұрғысынан алғанда, дәл қазір Еуропаның үздік екі командасы кездеседі. «Барселона» өте мықты көрінеді, бірақ әзірге оның аса ірі қарсыластармен ойнағанын көрген жоқпыз. Енді каталондықтарды Еуропаның қазіргі чемпиондарымен күресте күрделі сынақ күтіп тұр. ПСЖ алдыңғы турда мінсіз ойнап келе жатқан «Манчестер Ситиді» өз алаңында жеңді. Ал Париждегі өз алаңында, әрине, Луис Энрике шәкірттері аздаған фаворит саналады».
Сондай-ақ сарапшы екі командада да кадрлық мәселелер бар екенін атап өтті. Париждіктер сапында Нуну Мендеш ойнамайды, ал каталондықтардың қорғаушысы Жюль Кунденің алаңға шығуы әлі сұрақ белгісі болып тұр. Бұл командалардың, әсіресе қорғаныс қанаттарындағы ойынына әсер етуі мүмкін.
«Екі командада да жоғалтулар бар. Нуну Мендеш болмайды, бұл ПСЖ-ның тек қорғаныстағы емес, шабуылдағы ойынына да әсер етуі мүмкін. Дегенмен алдыңғы шептегі негізгі футболшылар бұл кездесуге дайын, бәрі демалып үлгерді. Ал «Барселонаның» оң жақ қорғаушысына қатысты да проблема бар: Эрик Гарсия ойнамайды, Жюль Кунденің алаңға шығуы екіталай. Сондықтан оң қапталда Жоау Канселу пайда болуы мүмкін».
Қорытындылай келе, Дидар Есемов көп гол соғылатын тартысты кездесу күтетінін, алайда алаң иелеріне басымдық беретінін айтты.
«Көре жатармыз, жарқын ойын мен көп гол күтемін. Бірақ меніңше, ПСЖ — фаворит. 3:1 есебімен жеңеді деп болжаймын».
ПСЖ турнирді өз алаңында словакиялық «Слованды» 6:1 есебімен жеңуден бастады, кейін сырт алаңда ағылшындық «Манчестер Ситиден» 4:2 есебімен басым түсті.
«Барселона» да алғашқы екі матчында жеңіске жетті. Ханси Фликтің командасы нидерландтық «Фейеноордты» 5:1 есебімен ойсырата ұтса, екінші турда сырт алаңда түркиялық «Галатасарайды» 4:1 есебімен жеңді.
Қарсыластар соңғы рет 2025 жылдың қазан айында Чемпиондар лигасының жалпы кезеңі аясында кездесті. Сол жолы сырт алаңда ПСЖ 2:1 есебімен жеңіске жетті.
Еске салайық, кездесу Париждегі «Парк де Пренс» стадионында өтеді және Қазақстан уақытымен 20 қазаннан 21 қазанға қараған түні басталады.
ПСЖ — «Барселона»: Парижде наразылықтар аясында өтетін Чемпиондар лигасының матчы. LIVE-трансляция
