Видео: Энрике «Барселонамен» матч алдында Париждегі тәртіпсіздіктер туралы пікір білдірді
ПСЖ бас бапкері Луис Энрике Чемпиондар лигасында «Барселонамен» өтетін кездесу қарсаңында Франциядағы шиеленісті жағдайға қатысты пікір білдірді. Елде жаппай тәртіпсіздіктер болып жатқанына қарамастан, испаниялық маман бар назарын тек футболға аударуға ниетті, деп хабарлайды Sports24.kz.
21 қазанға қараған түні Францияның ПСЖ клубы Чемпиондар лигасының жалпы кезеңіндегі үшінші турда каталониялық «Барселонаны» қабылдайды. Кездесу Париждегі «Парк де Пренс» стадионында өтіп, Астана уақытымен сағат 00:00-де басталады. Алайда көпшілік асыға күткен матчқа бір күн қалғанда жанкүйерлердің назары тек футболға ғана емес, Франциядағы жағдайға да ауды.
Соңғы күндері Францияда жаппай наразылық шерулері өтіп, кейбірі полициямен қақтығыстар мен тәртіпсіздіктерге ұласты. Осыған байланысты алдағы кездесудің қауіпсіздігіне қатысты сұрақтар туындады. Дегенмен Франция билігі ПСЖ мен «Барселона» арасындағы матчтың жоспарланған уақытта өтетінін растады.
Матч алдындағы баспасөз мәслихатында Луис Энрикеден елдегі жағдай команданың дайындығына әсер ете ме деп сұрады. Париждік клубтың бапкері қоғамдық-саяси ахуалды талқылағысы келмейтінін аңғартты.
«Мен бұл тақырыпқа қатысты пікір білдіретін адам емеспін. Сондықтан жоқ. Мен мұнда футбол туралы сөйлесу үшін келдім. Әрине, зорлық-зомбылық ешкімге ұнамайды. Бірақ біз осындай қоғамда өмір сүріп жатырмыз. Соған қарамастан, менің міндетім өзгермейді. Менің басты міндетім – алдағы матчқа бар назарымды аудару», – деді Энрике.
Сонымен қатар испаниялық маман командасын алда күрделі сынақ күтіп тұрғанын атап өтті. Бапкердің айтуынша, «Барселонамен» кездесу барынша мұқият әрі жинақы ойнауды талап етеді. Себебі каталониялық клубтың құрамында жоғары деңгейдегі футболшылар бар және командалық ойыны да жақсы жолға қойылған.
Sports24.kz назарларыңызға Луис Энрикенің «Барселонамен» матч алдындағы баспасөз мәслихатының орыс тіліне аударылып, дыбысталған толық бейнежазбасын ұсынады.
