Жасындай жарқыраған Төрехан, жартылай финалға жолдама алды
Қазақстандық боксшы Сабырхан Төрехан Болгарияның София қаласында өтіп жатқан Странджа кубогының 2025 жылғы жарысында жартылай финалға сенімді түрде шықты. Бұл беделді турнирді жиі "кіші әлем чемпионаты" деп атайды.
67 кг салмақ дәрежесіндегі 1/4 финалдық жекпе-жекте ол грузиялық Лаша Гогнидземен кездесті. Төрехан жоғары жылдамдықты, жойқын шабуылдарды және толық басымдықты көрсетті. Кездесу нәтижесі – 5:0, төрешілер бірауыздан қазақстандық боксшыны жеңімпаз деп таныды.
Осы сенімді жеңісінің арқасында Сабырхан кем дегенде турнирдің қола медалін иеленуді қамтамасыз етті. Оның қарқынды шабуылдары, агрессивті тактикасы мен әсерлі комбинациялары көрермендердің ыстық ықыласын тудырып, үлкен қошеметке ие болды.
Айта кету керек, Төрехан – жасөспірімдер мен жастар арасындағы Азия чемпионатында төрт мәрте жеңімпаз атанған тарихтағы алғашқы боксшы. Қазір ол ересектер арасында да өзін дәлелдеп, халықаралық аренада шеберлігін паш етуде.
Сондай-ақ оқыңыз: Жақпеков Кубок Странджа-2025 турнирінде жеңісті жолын жалғастырып, жартылай финалға шықты
