Соболенкоға WTA қорытынды турнирінде Муховадан жеңіледі деген болжам жасалды
Танымал спорт басылымы Last Word on Sports беларусь теннисшісі Арина Соболенко мен чехиялық Каролина Мухова арасындағы WTA-2026 қорытынды турнирінің матчына болжам жасады, деп хабарлайды Sports24.kz.
Сарапшылар Мухова сенсация жасап, әлемнің екінші ракеткасын үш сетте жеңе алады деп есептейді.
Чехиялық теннисшінің пайдасына келтірілген басты уәж — оның Соболенкоға қолайсыз ойын мәнері. Өзара кездесулерде Мухова 3:2 есебімен алда.
«Бұл — ойын мәнерлерінің айырмашылығына байланысты ерекше қызықты текетірес. Мухова Соболенкоға қиындық тудырудың жолын үнемі табады. Оның ойын мәнері Аринаға өз ырғағын табуға кедергі келтіреді. Соболенко Уханьдағы турнирде тізесінен жарақат алғаннан кейін денсаулығы жақсы екенін айтты, алайда аздаған жайсыздықтың өзі проблемаға айналуы мүмкін, ал Мухова мұны пайдаланатындай ақылды ойыншы», - делінген болжамда.
Сонымен қатар, осы маусымдағы статистика беларусь теннисшісінің пайдасына. Соболенко 47 рет жеңіске жетіп, 11 рет жеңілді. Сондай-ақ ол әлемдік рейтингтің үздік ондығындағы теннисшілерге қарсы жеті матчта жеңіске жетті.
Мухова биыл 43 жеңіске жетіп, 12 рет жеңіліс тапты. Оның басты жетістіктерінің қатарында Дохадағы WTA 1000 турнирінің титулы мен Уимблдон финалына шығуы бар.
Осылайша, Last Word on Sports Каролина Мухова үш сетте жеңеді деп болжап отыр.